Shavkat Mirziyoyev Iordaniyaga tashrif buyuradi

O‘zbekiston Prezidenti Shavkat Mirziyoyev 23–24-noyabr kunlari Iordaniya Podshohi Abdulla II taklifiga binoan ushbu mamlakatga davlat tashrifi bilan boradi. Amman shahrida oliy darajadagi muzokaralar va ikki mamlakat ishbilarmon doiralari ishtirokida biznes-forum o‘tkaziladi.
Muzokaralarda o‘zaro savdo hajmini oshirish va investitsiyalarni jalb qilish masalalari asosiy o‘rin tutadi. Shuningdek, tomonlar to‘qimachilik, tog‘-kon, kimyo va farmatsevtika sanoati, qishloq xo‘jaligi, turizm hamda madaniyat sohalaridagi hamkorlikni kengaytirishni muhokama qiladi. Tashrif yakunida qator ikki tomonlama hujjatlar imzolanishi kutilmoqda.
Savdo hajmi oshgan, ammo imkoniyatlar hali katta
O‘zbekistonning Iordaniya bilan o‘zaro savdosi 2025-yilda 8,5 million dollarni tashkil etgan. Bu ko‘rsatkich bir yil avvalgiga nisbatan 1,8 baravar ko‘p. Eksport hajmi 5,4 million dollar, import esa 3,1 million dollarga teng bo‘lgan.
Shu bilan birga, O‘zbekiston eksporti tarkibida oziq-ovqat mahsulotlari ulushi 94,2 foizni tashkil etgan. Mamlakatimizda Iordaniya kapitali ishtirokidagi 18 ta korxona faoliyat yuritmoqda. Bu ikki davlat o‘rtasidagi savdoda mahsulot turlarini ko‘paytirish va yangi qo‘shma loyihalarni yo‘lga qo‘yish imkoniyati borligini ko‘rsatadi.
Tashrif avvalgi kelishuvlarning davomi bo‘ladi
Mirziyoyevning Iordaniyaga tashrifi 2025-yil avgustida Abdulla II ning O‘zbekistonga davlat tashrifi chog‘ida erishilgan kelishuvlarning davomi hisoblanadi. O‘shanda Samarqandda ikki davlat rahbarlari qo‘shma bayonot qabul qilgan, tomonlar esa investitsiyalarni himoya qilish, turizm, qishloq xo‘jaligi, ta’lim va boshqa yo‘nalishlarni qamrab olgan 15 ta hujjatni imzolagan edi.
2026-yil 6-noyabr kuni ikki davlat rahbarlari Ostona shahrida ham uchrashdi. Unda avvalgi kelishuvlar ijrosi va savdo-iqtisodiy, investitsiyaviy hamda gumanitar aloqalarni rivojlantirish masalalari muhokama qilindi. Tomonlar o‘rtasida aviaqatnov yo‘lga qo‘yilgani, Hukumatlararo komissiya yig‘ilishi o‘tkazilgani va Ishbilarmonlar kengashi tashkil etilgani qayd etildi.
Ammandagi muzokaralarda endi ushbu kelishuvlarni yangi savdo bitimlari va aniq qo‘shma loyihalar bilan mustahkamlash masalasi ko‘rib chiqiladi.
Telegramga obuna böling
Sönggi yangiliklar bilan tanişing
Tavsiya etamiz

Adliya vazirligi yangilangan o‘zbek alifbosiga o‘tish rejasi loyihasini e’lon qildi

O‘zbekistonda kasallanganlar soni 20 foizga yetsa, maktab sinflari va bog‘cha guruhlari karantinga yopiladi

21–24-noyabr kunlari O‘zbekistonda ob-havo

O‘zbekiston Mozori Sharif bilan yuk temir yo‘l qatnovini yo‘lga qo‘yishga kelishib oldi
