Yangiliklar/Jamiyat

Toshkent metrosidagi 40 ta poyezdga beshinchi vagon qo‘shiladi

Jamiyat 20 noyabr, 20:36
 Toshkent metrosidagi 40 ta poyezdga beshinchi vagon qo‘shiladi

Toshkent metropoliteni «Moskva» rusumidagi 40 ta poyezdga bittadan qo‘shimcha vagon ulashni rejalashtirmoqda. Shu tariqa hozir to‘rt vagonda qatnayotgan tarkiblar besh vagonli bo‘ladi.

Metropoliten bu ishlar qachon boshlanishi va yakunlanishini ma’lum qilmagan. Loyihaning qiymati, moliyalashtirish manbasi va qo‘shimcha vagonlarni qaysi ishlab chiqaruvchidan olish rejalashtirilgani ham hozircha ochiqlanmagan.

40 ta poyezdni uzaytirish uchun jami 40 ta qo‘shimcha vagon kerak bo‘ladi. Biroq beshinchi vagon qo‘shilgach, har bir tarkibning sig‘imi qanchaga oshishi bo‘yicha aniq hisob-kitob e’lon qilinmadi.

Yana 28 ta besh vagonli poyezd olinadi

2027–2028-yillarda Toshkent metrosi uchun 28 ta yangi besh vagonli tarkib xarid qilish rejalashtirilgan. Bu jami 140 ta yangi vagon degani.

Avvalroq 2027-yilda 14 ta besh vagonli poyezd, ya’ni 70 ta vagon sotib olish loyihasi ma’lum qilingan edi. Ushbu xarid uchun alohida konsepsiya tayyorlangan, biroq ishlab chiqaruvchi tanlanmagan. Turli mamlakatlardagi kompaniyalarning takliflari ko‘rib chiqilishi aytilgan.

Hozircha avval e’lon qilingan 14 ta poyezd yangi rejadagi 28 ta tarkibning ichiga kirishi yoki alohida xarid qilinishi noma’lum. Metropoliten bu ikki rejaga aniqlik kiritmagan.

Toshkent metrosini rivojlantirishning uzoq muddatli rejalariga ko‘ra, 2030-yilgacha kunlik yo‘lovchilar sonini 1,8 million nafarga yetkazish maqsad qilingan. Shu davrgacha bekatlar sonini 79 taga, liniyalarning umumiy uzunligini 103 kilometrga oshirish hamda poyezdlar oralig‘ini bosqichma-bosqich 1,5–3 daqiqagacha qisqartirish rejalashtirilgan.

Metroda kuniga 1,2 milliondan ortiq yo‘lovchi yuradi

Toshkent metropoliteni hozir bir kunda 1,2 milliondan ortiq yo‘lovchiga xizmat ko‘rsatmoqda.

Sentyabr va oktyabr oylarida metrodan 61,7 million kishi foydalangan. Bu 2025-yilning shu davridagi 51,4 million yo‘lovchiga nisbatan 20 foiz ko‘p.

Yo‘lovchilar oqimining ortishi tig‘iz vaqtlarda bekatlar va vagonlarda yuklamani kuchaytirmoqda. Ayrim yo‘lovchilar vagonga kira olmagani uchun keyingi poyezdni kutishiga to‘g‘ri kelmoqda.

Hozir metro parkida 55 ta zamonaviy va 30 ta eski poyezd bor. Yangi tarkiblarning har biri 1,3 mingtagacha, eski poyezdlar esa o‘rtacha 1 ming nafar yo‘lovchini sig‘dira oladi.

Metropoliten tig‘iz paytda imkon qadar yangi poyezdlarni tanlashni tavsiya qilgan. Ularning sig‘imi eski tarkiblarga qaraganda taxminan 300 kishiga ko‘proq.

Yo‘lovchilarga platforma bo‘ylab taqsimlanish tavsiya qilindi

Metro ma’muriyati yo‘lovchilardan platformaning kirish qismida to‘planib qolmasdan, uning ichkari qismiga o‘tishni so‘radi. Bu odamlarning vagonlar bo‘ylab bir tekis taqsimlanishiga yordam beradi.

Poyezd kelganda avval vagondan tushayotgan yo‘lovchilarga yo‘l berish, undan keyin chiqish eshigi oldida to‘planmasdan vagonga kirish tavsiya etildi.

Metropoliten imkon bo‘lsa, yuklamasi pastroq bo‘lgan qo‘shni bekatlardan foydalanishni ham taklif qilmoqda.

Masalan, «Chilonzor» bekati bir kunda o‘rtacha 60–65 ming kishiga xizmat ko‘rsatadi. Undan keyingi «Mirzo Ulug‘bek» bekatidan esa kuniga 20–25 ming yo‘lovchi foydalanadi.

«Xalqlar do‘stligi» bekatidagi kunlik yo‘lovchilar soni 35–40 ming kishini tashkil etadi. Yaqin joylashgan «Milliy bog‘» bekatida bu ko‘rsatkich 6–8 ming kishi atrofida.

Biroq boshqa bekatdan foydalanish barcha yo‘lovchilar uchun ham qulay emas. Bu yo‘l vaqtini uzaytirishi yoki qo‘shimcha transport xarajatini keltirib chiqarishi mumkin. Shu sababli poyezdlar sig‘imini oshirish va qatnovlar oralig‘ini qisqartirish metrodagi yuklamani kamaytirishning asosiy choralaridan bo‘lib qolmoqda.

Besh vagonli poyezdlar avval ham sinalgan

2023-yil boshida O‘zbekiston yo‘nalishidagi to‘rtta poyezdga tajriba tariqasida bittadan vagon qo‘shilgan edi. Shundan keyin qolgan poyezdlarni uzaytirish rejasi davom ettirilmadi.

Toshkentga yetkazib berilgan 81-765/766/767 rusumidagi zamonaviy poyezdlar «Moskva» nomi bilan ham tanilgan. Vagonlar orasidagi germetik o‘tish joylari yo‘lovchilarga tarkib bo‘ylab erkin harakatlanish imkonini beradi.

Poyezdlarda iqlim nazorati, videokuzatuv, yo‘lovchilarga axborot yetkazish hamda yong‘inni avtomatik aniqlash va o‘chirish tizimlari mavjud.

Transport vazirligi ma’lumotiga ko‘ra, bu rusumdagi poyezdlar elektr energiyasini 35 foizgacha tejaydi. Asinxron dvigatellar esa foydalanish xarajatlarini 40 foizgacha kamaytirishi mumkin.

3940

Telegramga obuna böling

Sönggi yangiliklar bilan tanişing

→