Shavkat Mirziyoyevning Ostona safari qanday o‘tdi?

Prezident Shavkat Mirziyoyev 5-6 noyabr kunlari Qozog‘iston poytaxti Ostona shahrida amaliy tashrif bilan bo‘ldi. Safarning asosiy tadbiri Aqaba jarayoni doirasida Markaziy Osiyo davlatlari rahbarlarining sun’iy intellekt sohasidagi xavfsizlik masalalariga bag‘ishlangan uchrashuvi bo‘ldi.

Unda Qozog‘iston prezidenti Qosim-Jomart Toqayev, Tojikiston prezidenti Emomali Rahmon, Turkmaniston prezidenti Serdar Berdimuhamedov, Iordaniya qiroli Abdulla II hamda Qirg‘iziston va Ozarbayjon vakillari ishtirok etdi.

Uchrashuvda terrorizm va ekstremizmga qarshi kurash, raqamli texnologiyalar rivojlanishi bilan bog‘liq yangi tahdidlar hamda xalqaro hamkorlik masalalari muhokama qilindi. Yoshlar orasida radikallashuvning oldini olish bo‘yicha tajriba almashishga ham alohida e’tibor qaratildi.

Shavkat Mirziyoyev o‘z nutqida sun’iy intellekt texnologiyalari katta imkoniyatlar bilan birga yangi xavflarni ham yuzaga keltirayotganini ta’kidladi. Shu munosabat bilan u “Inson manfaatlari yo‘lida raqamli taraqqiyot” tashabbusini ilgari surdi. Tashabbus sun’iy intellektdan bilimlarni keng tarqatish, ishonch muhitini mustahkamlash va inson salohiyatini rivojlantirish maqsadlarida foydalanishni nazarda tutadi.

O‘zbekiston tomoni BMTning Aksilterror boshqarmasi mintaqaviy ofisini mamlakatda joylashtirishga ham tayyorligini bildirdi. Taklifga ko‘ra, ushbu ofis Markaziy Osiyo davlatlariga terrorizm bilan bog‘liq tahdidlarni aniqlash, mutaxassislarni tayyorlash va sun’iy intellekt imkoniyatlaridan foydalanish bo‘yicha amaliy yordam ko‘rsatishi mumkin.

Prezident, shuningdek, O‘zbekistondagi Islom sivilizatsiyasi markazi negizida “Raqamli davrda jaholatga qarshi ma’rifat” xalqaro dasturini ishga tushirish taklifini ilgari surdi. Loyiha ko‘p tilli axborot resurslari yaratish va yosh tadqiqotchilarni qo‘llab-quvvatlashga qaratilgan.

Safar doirasida Mirziyoyev Iordaniya qiroli Abdulla II bilan alohida uchrashuv ham o‘tkazdi. Tomonlar savdo-iqtisodiy, investitsiyaviy va madaniy-gumanitar hamkorlik istiqbollarini muhokama qildi. Shuningdek, avval erishilgan kelishuvlarning amalga oshirilishi ko‘rib chiqildi.

Tashrif yakunida O‘zbekiston prezidenti Ostona shahridan Toshkentga qaytib keldi. Safar davomida u mintaqa davlatlari rahbarlari va boshqa xalqaro hamkorlar bilan ham qator muloqotlar o‘tkazdi.