Flydubai samolyotidagi hodisa bo‘yicha yangi tafsilotlar paydo bo‘ldi

Flydubai aviakompaniyasi samolyoti bortida yuz bergan hodisa xalqaro OAV va ijtimoiy tarmoqlarda muhokama qilinmoqda. AQSh prezidenti Donald Tramp voqea yuzasidan yangi tafsilotlarni ma’lum qildi. Biroq uning bayonotida keltirilgan ayrim ma’lumotlar hozircha mustaqil ravishda tasdiqlanmagan.

Trampning so‘zlariga ko‘ra, parvoz vaqtida ikkinchi uchuvchi samolyot komandiriga pichoq bilan hujum qilgan. Jarohatlangan komandir kabinadan chiqib, yordam chaqirgan. Tramp Isroildan bo‘lgan, chilangar sifatida ishlaydigan yo‘lovchilardan biri hujum qilgan shaxsni zararsizlantirishga yordam berganini aytgan. Keyinchalik boshqa yo‘lovchilar ham uni ushlab turgan.

Trampning ta’kidlashicha, shundan so‘ng samolyot boshqaruvni yo‘qotib, keskin pastlay boshlagan. Yo‘lovchilardan biri uchuvchi o‘rniga o‘tirib, samolyotni barqarorlashtirishga yordam bergan. Keyinchalik boshqaruvni bortda bo‘lgan boshqa tajribali mutaxassislar o‘z qo‘liga olgan.

Isroil bosh vaziri Binyamin Netanyaxu voqeaning aynan ushbu talqinini to‘liq tasdiqlamagan. U hodisa haqida samolyot bortidagi suhbatdoshidan olingan ma’lumotlarga tayanib gapirgan. Uning so‘zlariga ko‘ra, samolyot sho‘ng‘iy boshlagan va yo‘lovchilardan biri ekipaj a’zosi bilan birga kabinaga kirib, pichoq bilan qurollangan shaxsni zararsizlantirishga yordam bergan.

Hujum qilgan shaxs qo‘lga olingani ma’lum qilingan. Jarohatlangan uchuvchi esa ayrim OAVlarda Smit Machchhar sifatida tilga olinmoqda. LinkedIn’dagi ma’lumotlarga ko‘ra, u 2022-yildan buyon Flydubai’da kapitan bo‘lib ishlaydi. Bungacha SpiceJet aviakompaniyasida faoliyat yuritgan.

Hodisaning barcha tafsilotlari va hujumchining ehtimoliy maqsadi hozircha aniqlanmoqda. Reuters, The Guardian, The Washington Post, Le Monde va The National kabi xalqaro nashrlar voqeani ehtiyotkorlik bilan yoritib, uni tasdiqlangan terakt yoki samolyotni olib qochishga urinish sifatida baholamayapti.

Ijtimoiy tarmoqlarda samolyot tomonidan 7700 va 7500 kodlari uzatilgani ham muhokama qilinmoqda. 7700 umumiy favqulodda holat signalini, 7500 esa noqonuniy aralashuv yoki samolyotni olib qochish bilan bog‘liq signalni anglatadi. Biroq ushbu kodlarning uzatilgani hodisaning motivini o‘z-o‘zidan tasdiqlamaydi.

Isroil rasmiylari hodisadan so‘ng ekipajlar va aviaqatnovlarni tekshirish bo‘yicha xavfsizlik choralarini kuchaytirishni topshirgan. Voqeaning sabablari va aniq tafsilotlari tergov yakunlangach ma’lum bo‘lishi kutilmoqda.