Davlat UzAuto Motors va UzAuto Motors Powertrain’ni xususiylashtirishga qoʻyadi

Davlat aktivlarini boshqarish agentligi (DABA) yaqin vaqt ichida UzAuto Motors va UzAuto Motors Powertrain kompaniyalaridagi davlat ulushlarini xususiylashtirish bo‘yicha tenderlarni e’lon qiladi. Bu haqda agentlik direktorining o‘rinbosari Alisher Miraliyev Cbonds’ning VIII xalqaro «O‘zbekiston Respublikasi kapital bozori» konferensiyasida ma’lum qildi.

Uning so‘zlariga ko‘ra, avtosanoatning ikki yirik aktivi bo‘yicha tenderlarni allaqachon yaqin vaqt ichida e’lon qilish rejalashtirilgan.

Gap davlat ulushi sotilishi haqida ketmoqda: UzAuto Motorsda davlatga aksiyalarning 99,7%i tegishli, shuningdek UzAuto Motors Powertraindagi 100 foizlik ulush ham sotiladi. Avval tasdiqlangan xususiylashtirish dasturiga ko‘ra, ushbu aktivlar bo‘yicha bitimlarni 2025 yil oxiri va 2026 yil boshiga qadar tayyorlash rejalashtirilgan edi.

Yirik davlat korxonalarini sotuvga tayyorlash ishlari bir necha oydan beri olib borilmoqda. Aprel oyida DABA direktori Sohibjon Murodov prezidentga UzAuto Motors, uning tarkibiga kiruvchi korxonalar, shuningdek «Navoiyazot» va issiqlik elektr stansiyalarini ham o‘z ichiga olgan bir qator yirik aktivlarni xususiylashtirish bo‘yicha ishlar borishi haqida hisobot bergan.

Kutilishicha, xususiylashtirish O‘zbekiston davlat aktivlari bozoridagi eng yirik loyihalardan biriga aylanadi va xalqaro investorlar e’tiborini tortadi.

Shu bilan birga, avvalroq rasmiylar strategik jihatdan muhim korxonalarda davlat tasarrufida «oltin aksiya» deb ataluvchi mexanizmni saqlab qolish imkoniyati borligini ma’lum qilgan edi. Bunday mexanizm nazorat paketi sotilgandan keyin ham muhim qarorlar qabul qilishda davlatga maxsus huquqlarni saqlab qolish imkonini beradi.