Seulga tashrif doirasida Shavkat Mirziyoyev bir qator uchrashuv va muzokaralar oʻtkazdi

Janubiy Koreyaga davlat tashrifi doirasida O‘zbekiston prezidenti Shavkat Mirziyoyev Milliy Assambleya spikeri Cho Chjon Sik va bosh vazir Han Son Suk bilan uchrashuvlar o‘tkazdi, shuningdek, o‘zbek-koreys biznes-forumida ishtirok etdi.

Janubiy Koreya Milliy Assambleyasi spikeri bilan uchrashuvda tomonlar o‘zbek-koreys alohida strategik sheriklikni mustahkamlashda parlamentlarning muhim rolini qayd etdilar. Parlamentlararo hamkorlikni rivojlantirish, ixtisoslashgan qo‘mitalar o‘rtasidagi hamkorlik va koreys tomoni ko‘magida joriy etilayotgan «Elektron parlament» loyihasini amalga oshirish masalalari muhokama qilindi.

Eng avvalo savdo-iqtisodiy, investitsiyaviy hamda madaniy-gumanitar sohalarda yuqori darajada erishilgan kelishuvlar bajarilishi ustidan parlament nazoratiga alohida e’tibor qaratildi.

Shuningdek, tomonlar 2027-yilda O‘zbekiston va Janubiy Koreya o‘rtasida diplomatik munosabatlar o‘rnatilganining 35 yilligi munosabati bilan parlament diplomatiyasi yo‘nalishida bir qator tadbirlar o‘tkazishga kelishib oldilar.

Bosh vazir Han Son Suk bilan uchrashuv chog‘ida savdo, investitsiyalar, texnologiyalar, transport va logistika sohalaridagi hamkorlik istiqbollari muhokama qilindi. Innovatsion-texnologik sheriklikni, raqamli iqtisodiyot, kiberxavfsizlik hamda strategik ahamiyatga ega minerallarni qayta ishlashni rivojlantirishga ustuvor e’tibor qaratildi.

Keyinroq Shavkat Mirziyoyev va Han Son Suk davlat tuzilmalari hamda har ikki mamlakat ishbilarmon doiralaridan 300 dan ortiq vakilni jamlab, qo‘shma biznes-forum ochilishida ishtirok etdilar. Tadbirda Lotte Chemical, Hyundai Motor Group, Samsung C&T, CJ Group, Kia Corporation, Hyundai Rotem va Shinhan Financial Group kabi yirik kompaniyalar rahbarlari qatnashdi.

Forumda so‘zga chiqqan O‘zbekiston prezidenti Janubiy Koreya mamlakatning asosiy strategik va iqtisodiy sheriklaridan biri ekanini ta’kidladi. U investitsiyalarni kengaytirish, yangi ishlab chiqarish quvvatlarini ishga tushirish va texnologik kooperatsiyani rivojlantirish uchun keng imkoniyatlar mavjudligini alohida qayd etdi.

Davlat rahbari O‘zbekiston-koreys sanoat-texnologik alyansini tuzishni taklif qildi, u sanoat va innovatsiyalar sohasida hamkorlikni chuqurlashtirishning amaliy mexanizmiga aylanishi mumkin.

Hamkorlikning ustuvor yo‘nalishlari qatorida energetika va «yashil» iqtisodiyot, raqamli texnologiyalar va sun’iy intellekt, mikroelektronika va yarimo‘tkazgichlar, biotexnologiyalar va farmatsevtika, transport infratuzilmasi, shuningdek, qo‘shma ilmiy tadqiqotlar va kadrlar tayyorlash tilga olindi.