Toshkent markazida daraxt ikki mashina ustiga qulab, koʻchani toʻsib qoʻydi

Toshkentda 2-sentabr kuni ertalab katta daraxt oʻtib ketayotgan Chevrolet Tracker va Leapmotor C11 avtomobillari ustiga qulab tushdi. Voqea soat 05:30 atrofida, Mahtumquli koʻchasida, Amir Temur maydoni va “Oʻzbekiston” xalqaro anjumanlar saroyidan uncha uzoq boʻlmagan joyda sodir boʻlgan.

Daraxtning qulashi natijasida hududda transport harakati butunlay toʻsib qoʻyilgan. Voqea joyiga zudlik bilan Favqulodda vaziyatlar vazirligi xodimlari, tez tibbiy yordam brigadalari va boshqa favqulodda xizmatlar vakillari yetib keldi. Poytaxt favqulodda vaziyatlar departamenti ma’lumotlariga koʻra, qurbonlar yoʻq. Avtotransport haydovchilari va yoʻlovchilari jabrlanmagan.

Oqibatlarni bartaraf etish uchun qutqaruvchilarga bir necha soat kerak boʻldi. Mutaxassislar daraxtni arraladi va olib tashladi, shundan soʻng yoʻl qismi shoxlar va boshqa shikastlangan elementlardan tozalandi. Ishlar nihoyasiga etgach, Mahtumquli koʻchasida transport harakati toʻliq tiklandi.