6-sentabr kuni yarim marafon munosabati bilan Toshkent markazida 12 ta koʻchasi vaqtincha yopiladi

6-sentabr kuni Toshkentda Oʻzbekiston Mustaqilligi kuniga bagʻishlangan xalqaro yarim marafon boʻlib oʻtadi. Shu munosabat bilan poytaxt markazida soat 05:00 dan 14:00 ga qadar 12 ta koʻcha yopilgan holda alohida harakat rejimi joriy etiladi.

Cheklovlar quyidagi yoʻnalishlarga ta’sir qiladi:

• Islom Karimov koʻchasi (Furqatdan Sharof Rashidov shoh koʻchasigacha),
• Sharof Rashidov shoh koʻchasi (Afrosiyobdan Islom Karimovgacha),
• Afrosiyob va Oybek koʻchalari (Nukusgacha),
• Nukus va Abdulla Qodiriy koʻchalari (Hamidulla Oripovga),
• Hamidulla Oripov koʻchasi va Mustaqillik shoh koʻchasi (Amir Temur maydonigacha),
• Amir Temur maydoni atrofidagi halqa (shu jumladan, Buxoro va Shahrisabz koʻchalarigacha boʻlgan qismlar),
• Alisher Navoiy, Botir Zokirov va Ukchi koʻchalari (Shahrisabzdan Furqatgacha).

Agar ishtirokchilar va tomoshabinlar oqimi koʻp boʻlsa, taqiqlangan hudud kengaytirilishi mumkin. Haydovchilarga marshrutlarni oldindan rejalashtirish va aylanma yoʻllardan foydalanish tavsiya etiladi.