O‘zbekistonda 1-sentabrdan havo harorati pasayadi

“O‘zgidromet” ma’lumotlariga ko‘ra, avgust oyining oxirigacha O‘zbekistonning aksariyat hududlarida mo‘tadil issiq ob-havo saqlanib qoladi. Kunduzgi havo harorati +33...+38 daraja, janubiy hududlarda esa ayrim joylarda +39...+40 darajagacha ko‘tariladi.

31-avgustdan boshlab mamlakatning shimoli-g‘arbiy hududlariga salqin havo oqimi kirib kela boshlaydi. Natijada ushbu hududlarda kunduzgi harorat +25...+30 darajagacha pasayadi. 1-sentabr kuni salqin havo massasi butun respublika bo‘ylab tarqaladi va havo harorati o‘rtacha 3-5 darajaga pasayadi.

Yaqin kunlarda mamlakatning katta qismida yog‘ingarchiliksiz ob-havo kuzatiladi. Faqat Qoraqalpog‘istonning shimoliy hududlarida juma va shanba kunlari qisqa muddatli yomg‘ir hamda momaqaldiroq bo‘lishi mumkin. Shuningdek, ayrim joylarda shamol tezligi 13-18 m/s gacha kuchayishi, ba’zi hududlarda esa 20-22 m/s gacha yetib, chang-to‘zon kuzatilishi mumkin.

Toshkentda yog‘ingarchilik kutilmaydi. 28-30-avgust kunlari harorat +35...+38 daraja, 31-avgustda +34...+36 daraja, 1-sentabrda esa +30...+32 daraja bo‘ladi.