Surxondaryoda 3 kg ga yaqin narkotik moddalar musodara qilindi

Surxondaryo viloyatida narkotik moddalarning noqonuniy aylanishi bilan bogʻliq uchta holatga chek qoʻyildi. Jami 3 kg ga yaqin opiy va gashish musodara qilindi: epizodlardan birida Afgʻoniston fuqarosi giyohvand moddalarni oʻz tanasiga olib oʻtgan.

Denov tumanida muqaddam narkotik moddalar savdosi uchun sudlangan 1980-yilda tugʻilgan shaxsning uyidan 1 kg 7 gr opiy va 998 gr gashish topilgan. Huquq-tartibot idoralari vakillarining soʻzlariga koʻra, giyohvand moddalar keyinchalik sotish uchun saqlangan.

Xuddi shu hududda muqaddam sudlangan 1986 va 1966-yillarda tugʻilgan yana ikki nafar fuqaro qoʻlga olindi. Ular 491 gramm gashish giyohvandlik moddasini soxta xaridorga 85 million soʻmga sotayotgan vaqtda ushlandi.

Yana bir voqea Termiz shahrida sodir boʻldi. Termiz xalqaro savdo markazi hududida 2003-yilda tugʻilgan Afgʻoniston fuqarosi 506 gr opiyni 2500 AQSh dollariga sotayotgan vaqtida qoʻlga olindi.

Preparat qoʻshni davlatdan yashirin tarzda olib kelingan - erkak ichki a’zolaridan birini "tirik idish" sifatida ishlatgan. Barcha holatlar yuzasidan jinoyat ishi qoʻzgʻatilgan.