Oʻzbekistonda hafta oxirigacha issiqlik 4–7 darajaga tushishi kutilmoqda

Oʻzbekiston Gidrometeorologiya xizmati agentligi 14-avgustdan 21-avgustgacha boʻlgan prognozni e’lon qildi. Respublikaning aksariyat hududlarida havo haroratining kunduzi bir necha darajaga bosqichma-bosqich pasayishi kutilmoqda.

Qoraqalpogʻiston va Xorazm viloyatida havo harorati 34-39 darajadan 30-35 darajagacha pasayadi. Buxoro va Navoiy viloyatlarida — 37—42—32—37 daraja; 16–17 avgust kunlari bu yerda shamol tezligi 13–18 m/s gacha kuchayishi, chang boʻroni boʻlishi mumkin. Toshkent, Jizzax, Samarqand va Sirdaryo viloyatlarida havo harorati taxminan 35-40 darajadan 31-36 darajagacha pasayadi.

Qashqadaryo va Surxondaryo viloyatlari eng issiq boʻlib qoladi: bu yerda havo harorati atigi 37-42 darajadan 34-39 darajagacha pasayadi, joylarda chang boʻroni boʻlishi kutilmoqda. Andijon, Namangan va Fargʻona viloyatlarida havo harorati kunduzi 35–40 dan 30–35 darajagacha pasayadi, moʻtadil shamol 10 m/s gacha kuchayadi.

Togʻli hududlarda 14-avgust kuni qisqa muddatli yomgʻir yogʻib, momaqaldiroq boʻlishi mumkin, 15-avgustdan esa yogʻingarchilik boʻlmaydi. Togʻli hududlarda havo harorati 28-33 dan 22-27 darajagacha pasayadi.