“Sea Breeze Uzbekistan”ning ekologik bahosi hali tugallanmagan

Charvak suv ombori sohilida barpo etilishi rejalashtirilayotgan Sea Breeze Uzbekistan kurort majmuasi loyihasi hozircha to‘liq ekologik xulosa olmadi. Davlat ekologik ekspertiza markazi ayni paytda faqat loyiha uchun yer uchastkasini tanlashga oid hujjatlarni ko‘rib chiqqan. Asosiy ekologik ekspertiza esa hali o‘tkazilmagan. Bu haqda 5-avgust kuni bo‘lib o‘tgan matbuot anjumanidan so‘ng Davlat ekologik ekspertiza markazi direktori G‘ayrat Muhamedov ma'lum qildi.

Uning so‘zlariga ko‘ra, yirik loyihalarning ekologik baholanishi ikki bosqichda amalga oshiriladi. Dastlab mutaxassislar yer uchastkasini tanlashning asoslanganligini o‘rganadi, undan keyin esa obyektning atrof-muhitga ehtimoliy ta'sirini tahlil qiluvchi kompleks ekologik ekspertiza o‘tkaziladi.

Ikkinchi bosqichda ekspertlar loyihaning o‘simlik va hayvonot dunyosiga ta'siri, bo‘lajak majmuaning bosh rejasi, oqava suvlarni tozalash inshootlari parametrlari, muhandislik infratuzilmasi, ko‘chmas mulk obyektlari soni hamda boshqa texnik yechimlarni o‘rganadi.

Yakuniy xulosa chiqarilishidan oldin Botanika va Zoologiya institutlari mutaxassislari olib borayotgan ilmiy tadqiqotlar yakunlanishi kerak. Kuzatuvlar kuz, qish va bahor mavsumlarini qamrab oladi. Bu Charvak ekotizimiga loyihaning turli fasllardagi ta'sirini baholash imkonini beradi. Tadqiqotlar natijalari va loyiha hujjatlarining to‘liq paketi taqdim etilgandan keyingina Davlat ekologik ekspertiza markazi yakuniy qaror qabul qilishi mumkin bo‘ladi.

Markaz rahbarining ta'kidlashicha, loyihaning yakuniy varianti hozircha ishlab chiqish bosqichida. Davlat ekspertlariga hali tozalash inshootlarining quvvati, kutilayotgan tashrif buyuruvchilar soni, kottejlar va kurort hududidagi boshqa obyektlar haqidagi ma'lumotlar taqdim etilmagan. Dastlabki hisob-kitoblarga ko‘ra, loyiha hujjatlarini tayyorlash yana qariyb ikki yil davom etishi mumkin.

Shu bilan birga, kelajakdagi majmua hududida allaqachon tayyorgarlik ishlari olib borilmoqda. Xususan, qirg‘oq chizig‘ini mustahkamlash, hududni obodonlashtirish va daraxt ekish ishlari amalga oshirilmoqda. To‘liq hajmdagi qurilish ishlari esa hali boshlanmagan. Ekspertiza yakunlangach, ekologik xulosa Davlat ekologik ekspertiza markazining rasmiy portali va saytida ochiq e'lon qilinishi rejalashtirilgan.

Sea Breeze Uzbekistan loyihasi Toshkent viloyatining Bo‘stonliq tumanida, 577 gektar maydonda amalga oshirilmoqda. Uni amalga oshirish to‘g‘risidagi qaror Vazirlar Mahkamasi tomonidan 2025-yil avgust oyida qabul qilingan. Loyiha investorlari sifatida Ozarbayjonning Agalarov Development kompaniyasi va Sea Breeze Uzbekistan kompaniyasi ishtirok etmoqda. Loyihaning majburiy talablaridan biri ekologik me'yorlarga qat'iy rioya qilish hisoblanadi. Jumladan, chiqindilar va oqava suvlarni Charvak suv ombori hamda Chirchiq daryosiga tashlash qat'iyan taqiqlanadi.