“Samarqand-2028” sun’iy yoʻldoshi uchirilganidan bir necha soat oʻtib Yerga birinchi tasvirni uzatdi

«Samarkand-2028» giperspektral sun’iy yo‘ldoshi 5-avgust kuni Xitoyning Shandun provinsiyasi qirg‘og‘i yaqinidagi dengiz platformasidan uchirilganidan so‘ng, oradan bir necha soat o‘tib Yerga ilk kosmik tasvirini muvaffaqiyatli uzatdi.

Qurilmaning birinchi surati sivilizatsiyalar chorrahasi sifatida tanilgan Gretsiya poytaxti Afinalar ustida olingan. Tasvirning muvaffaqiyatli uzatilishi missiyaning muhim bosqichi bo‘lib, sun’iy yo‘ldoshning barcha bort tizimlari odatiy rejimda ishlayotganini va belgilangan vazifalarni bajarishga tayyor ekanini tasdiqladi.

«Samarkand-2028» O‘zbekiston ishtirokidagi eng yirik xalqaro kosmik loyihalardan biri hisoblanadi. Sun’iy yo‘ldosh Xitoyning STAR.VISION kompaniyasi tomonidan “O‘zbekkosmos” agentligi bilan hamkorlikda ishlab chiqilgan. Uning asosiy xususiyatlaridan biri o‘zbekistonlik muhandislar yaratgan sun’iy intellekt modulidir. STAR.VISION’ning xalqaro loyihalari tarixida ilk bor O‘zbekistonda ishlab chiqilgan sun’iy intellekt texnologiyasi qo‘llanildi.

Modul ma’lumotlarning bir qismini Yerga yuborilishidan oldin to‘g‘ridan-to‘g‘ri orbitada qayta ishlash imkonini beradi. Bu uzatiladigan ma’lumotlar hajmini kamaytirib, tahlil natijalarini olish jarayonini tezlashtiradi.

Giperspektral sun’iy yo‘ldosh Yer kuzatuvlari uchun mo‘ljallangan bo‘lib, qishloq xo‘jaligi, suv resurslarini monitoring qilish, atrof-muhitni muhofaza qilish, favqulodda vaziyatlarning oldini olish, shaharsozlik va tabiiy resurslarni boshqarishda qo‘llanilishi mumkin. Oddiy masofaviy zondlash sun’iy yo‘ldoshlaridan farqli ravishda, u ko‘plab spektral diapazonlarda ma’lumot to‘playdi, bu esa odatiy kameralar qayd eta olmaydigan o‘zgarishlarni aniqlash imkonini beradi.

«Samarkand-2028» nomi 2028-yilda Samarqand shahrida bo‘lib o‘tadigan Xalqaro astronavtika kongressi (IAC) bilan bog‘liq. Mazkur nufuzli tadbir Markaziy Osiyo tarixida ilk bor aynan Samarqandda tashkil etiladi.