Toshkentda mast yoʻlovchi avtobusning old oynasini sindirib, haydovchini kaltakladi

Toshkent shahrining Chilonzor tumanida mast holda yoʻlovchi 98-sonli yoʻnalishdagi avtobusda tartibsizlik keltirib, old oynasini sindirib, haydovchini kaltaklagan. Bu haqda poytaxt ichki ishlar boshqarmasi xabar berdi.

Voqea 1-avgust kuni soat 14:30 atrofida yuz bergan. 1982-yilda tugʻilgan, muqaddam sudlangan erkak avtobusda jamoat tartibini buzgan va haydovchining ishiga aralashgan. Haydovchi gʻalayonchini quvib chiqarmoqchi boʻlganida, u mushti bilan old oynaga urib sindirgan, soʻng haydovchining yuzi va boʻyniga bir necha marta zarba berib, tan jarohati yetkazgan.

Tergovga qadar tekshiruv oʻtkazilmoqda, uning natijalariga koʻra protsessual qaror qabul qilinadi.