O‘zbekistonda YTHlarda OSAGO va sug‘urta to‘lovlari qoidalari o‘zgardi

O‘zbekiston prezidenti Shavkat Mirziyoyev 22-iyun kuni sug‘urta sohasini tartibga solishni takomillashtiruvchi qonunni imzoladi. Hujjat Fuqarolik kodeksi hamda yana 9 ta qonun hujjatlariga o‘zgartirish kiritadi.

Foydalanuvchilar soni cheklanmagan OSAGO polislarida endi transport vositasi egasi va uning qarindoshlari ko‘rsatilmaydi, biroq ularning fuqarolik javobgarligi sug‘urtalangan hisoblanadi. Yo‘l-transport hodisasi yuz berganda, haydovchilar o‘zaro kelishuv asosida to‘lovni olish uchun aybdor tomon sug‘urtachisiga bevosita murojaat qilishi mumkin. Sug‘urtachi bunday arizani ko‘rib chiqishi shart.

2026-yil 1-yanvardan boshlab OSAGO bo‘yicha sug‘urta qoplamasi ikki baravar oshirilib, 40 million so‘mdan 80 million so‘mga yetkazildi. Shu bilan birga, polis narxi ham deyarli to‘rt baravar oshdi: hududlarda 40 ming so‘mdan 160 ming so‘mga, Toshkent shahri va Toshkent viloyatida esa 56 ming so‘mdan 192 ming so‘mga. Tariflarning oshishiga sug‘urta kompaniyalarining yuqori zarar ko‘rishi sabab bo‘lgan: Toshkentda har 100 so‘m yig‘ilgan mukofotga 146 so‘m to‘lov to‘g‘ri kelgan.

2026-yil 1-apreldan Yagona sug‘urta billing tizimi ishga tushirildi. U to‘lovlarni hisobga olishni avtomatlashtirish va sug‘urtachilar hamda davlat organlari o‘rtasida ma’lumot almashinuvini elektron shaklda yo‘lga qo‘yish uchun mo‘ljallangan.

Shuningdek, iste’molchilar uchun sug‘urta xizmatlari bo‘yicha majburiy ma’lumotlar ro‘yxati qonun bilan belgilandi. Unga xizmat shartlari, narxi, to‘lov miqdori, afzalliklar hamda sug‘urta va sug‘urta hisoblanmaydigan holatlar kiradi. Bundan tashqari, prudensial me’yorlar buzilgan yoki kompaniya to‘lovga qodir bo‘lmagan holatlarda sug‘urtachilarning foyda taqsimlashiga cheklovlar joriy etildi — bu mablag‘larning asossiz chiqarilishini oldini olishga qaratilgan.