2026-yilda dunyoning eng goʻzal aeroportlari nomi e’lon qilindi

Xalqaro Prix Versailles arxitektura mukofoti 2026 yilning eng chiroyli aeroportlari ro‘yxatini e’lon qildi. Bu yilgi reytingga dunyoning turli hududlaridan yettita aeroport kirdi va ulardan faqat bittasi Yevropada joylashgan.

Yevropadagi yagona vakil — Germaniyadagi Frankfurt aeroportining yangi 3-terminali bo‘ldi. U 2026 yil bahorida ochilgan bo‘lib, yiliga taxminan 19 million yo‘lovchiga xizmat ko‘rsatish imkoniyatiga ega. Loyihani me’mor Kristof Mekkler boshchiligidagi jamoa ishlab chiqqan.

Terminal konsepsiyasi shahar muhitidan ilhomlangan: ichki makon ko‘chalar va maydonlar shaklida tashkil etilgan. Tabiiy toshlar va iliq ranglar qo‘llanilgan, keng oynavand fasadlar esa ichkariga ko‘p miqdorda tabiiy yorug‘lik kiritadi.

Markaziy hududda uchta aylanuvchi diskdan iborat san’at obyektlari o‘rnatilgan. Ushbu installyatsiya makon ko‘rinishini doimiy ravishda o‘zgartirib, terminalga dinamik kayfiyat bag‘ishlaydi.

Ro‘yxatga, shuningdek, quyidagi aeroportlar ham kiritildi:

• Guanchjou aeroportining 3-terminali — gul shaklidan ilhomlangan dizayn;
• Hindistonning Guvahati shahridagi 2-terminal — tabiiy motivlarga asoslangan yechim;
• Navi-Mumbay aeroportining 1-terminali — lotos guli shaklidagi ustunlar;
• Kambodjadagi Pnompen aeroporti — milliy me’morchilik elementlari bilan;
• Pittsburg aeroporti — tabiatga yaqin dizayn;
• San-Diyego aeroportining 1-terminali — katta shisha fasad va ochiq makonlar.

Baholash jarayonida dizayn bilan birga funksionallik, qulaylik va ekologik yondashuv ham hisobga olingan.