Toshkent viloyatida yirik miqdordagi sintetik narkotik modda musodara qilindi

Toshkent viloyatining Zangiota tumanida narkotik moddalar noqonuniy aylanmasi holatiga chek qo‘yildi. Bu haqda DXX matbuot xizmati ma’lum qildi.

Kuzatuv ostida bo‘lgan 32 yoshli Qoraqalpog‘istonlik fuqaro qo‘lga olindi. Undan xorijdan yuborilgan suv nasosi musodara qilindi. Tekshiruv vaqtida uning ichidan 968 gramm «alfa‑PVP» sintetik giyohvandlik moddasi aniqlangan.

Shuningdek, gumonlanuvchi ijaraga olgan Toshkent shahri Yangihayot tumanidagi xonadondan elektron tarozi, zip-paketlar va skotch topildi. Tergov ma’lumotlariga ko‘ra, ular moddalarni qadoqlashda ishlatilgan.

Aniqlanishicha, fuqaroga internet orqali narkotik savdosi bilan bog‘liq do‘konda faoliyat yuritgan.

Holat yuzasidan jinoyat ishi qo‘zg‘atilgan, tergov harakatlari davom etmoqda.