IIV “Soʻnggi qoʻngʻiroq” oldidan bitiruvchilar va ota-onalarga murojaat qildi

“So‘nggi qo‘ng‘iroq” arafasida Ichki ishlar vazirligi bitiruvchilar va ularning ota-onalariga bayram tadbirlari vaqtida xavfsizlik qoidalariga amal qilish zarurligini eslatdi.

25-may kuni 10 mingdan ortiq maktabda tantanali tadbirlar bo‘lib o‘tadi. Bir milliondan ortiq o‘quvchilar uchun so‘nggi qo‘ng‘iroq yangraydi. Bu yil ilk bor bitiruvchilar uchun Olimpiya shaharchasida yirik yoshlar open-air festivali tashkil etiladi. Unda taxminan 12 ming kishi ishtirok etishi kutilmoqda, bitiruvchilar uchun kirish bepul bo‘ladi.

Yoshlar xavfli harakatlardan voz kechishga chaqirildi: rulga o‘tirmaslik, samokat va skuterlarda yo‘l qatnov qismiga chiqmaslik, ko‘cha poygalari, avtokolonalar va driftlarda qatnashmaslik.

Shuningdek, alkogol va taqiqlangan moddalarni iste’mol qilishning xavfli ekani alohida ta’kidlandi — bu jiddiy oqibatlarga olib kelishi mumkin.

Ota-onalarga bolalarni, ayniqsa kechki va tungi vaqtda, nazoratda ushlash, shuningdek, suv havzalarida cho‘milish bilan bog‘liq xavflarni oldindan tushuntirish tavsiya etildi.

Bundan tashqari, pichoq, kastet va boshqa xavfli buyumlarni olib yurish taqiqlangani eslatildi.

Bayram tadbirlari sabab ayrim hududlarda vaqtinchalik transport harakati cheklanishi mumkin. Aholiga imkon qadar jamoat transportidan foydalanish va yo‘nalishlarni oldindan rejalashtirish tavsiya etiladi.