Spinal mushak atrofiyasi tashxisi qo‘yilgan bolalar uyda davolanish uchun zarur jihozlar bilan ta’minlanadi

Oʻzbekistonda oʻmurtqa mushak atrofiyasi (SMA) tashxisi qoʻyilgan bolalarni uy sharoitida davolash uchun tibbiy asbob-uskunalar va reabilitatsiya vositalari bilan ta’minlash tartibi tasdiqlandi. Tegishli qoida Hukumatning 2026-yil 17-apreldagi 184-son qarorida mustahkamlangan.

Hujjatga koʻra, bunday tashxis qoʻyilgan bolalarning ota-onalari yoki qonuniy vakillari yashash joyidagi tuman yoki shahar tibbiyot birlashmalariga bolani uyda davolash zarurligi toʻgʻrisida ariza bilan murojaat qilishlari mumkin.

Arizaga tashxisi tasdiqlangan tibbiy xulosa, shuningdek foydalanish uchun tavsiya etilgan asbob-uskunalar, protez-ortopediya buyumlari va texnik reabilitatsiya vositalarining roʻyxati ilova qilinadi.

Murojaatlar hududiy ishchi guruhi tomonidan koʻrib chiqilib, 10 kun ichida qaror qabul qiladi. Guruhlar kelib tushgan murojaatlar asosida har yili 1-iyungacha zarur jihozlarga boʻlgan umumiy ehtiyojni shakllantirib, respublika ishchi guruhiga elektron shaklda joʻnatadi.

Respublika ishchi guruhi ma’lumotlarni umumlashtirib, 15-iyunga qadar Oʻzbekiston Sogʻliqni saqlash vazirligiga topshiradi. Vazirlik, oʻz navbatida, keyingi yilning 1-iyuniga qadar qonun hujjatlarida belgilangan tartibda asbob-uskunalar va mablagʻ sotib olish choralarini koʻradi.

Xarid qilingan asbob-uskunalarni hududlar boʻyicha taqsimlash har yili 1 iyulgacha amalga oshiriladi. Mablagʻlarni bolaning ota-onasi yoki qonuniy vakillariga oʻtkazish ular olingan kundan boshlab 10 kun ichida amalga oshiriladi va tibbiy muassasalar vakillari ishtirokida tuzilgan shartnoma asosida tuziladi.