Indoneziya qirg‘oqlarida dahshatli zilzila sodir bo‘ldi

Indoneziyaning Ternate shahri yaqinidagi Shimoliy Maluku dengizida 7,4 magnitudali kuchli zilzila yuz berdi. Dastlabki ma’lumotlarga ko‘ra, yer silkinishi oqibatida bir kishi halok bo‘lgan, yana bir kishi jarohat olgan.

Favqulodda vaziyatlar milliy agentligi ma’lumotiga ko‘ra, tebranishlar 20 soniyagacha davom etgan va Ternate, Bitung hamda Manado shaharlarida aniq sezilgan. Manado shahrida vayronalar ostida qolgan 70 yoshli ayol halok bo‘lgan. Shuningdek, jarohatlanganlar shifoxonalarga yetkazilgani ma’lum. Qutqaruvchilar ayniqsa olis hududlarni o‘rganishni davom ettirmoqda.

Zilzila ortidan ayrim kuzatuv stansiyalarida 30–75 santimetr balandlikdagi tsunami to‘lqinlari qayd etildi. Dastlab xavf haqida ogohlantirish berilgan bo‘lsa-da, bir necha soatdan so‘ng to‘lqinlar kuchaymayotgani aniqlangach, ogohlantirish bekor qilindi. Shunga qaramay, sohil hududlaridagi aholiga ehtiyot bo‘lib, shikastlangan binolardan uzoq turish tavsiya qilindi.