Yangiliklar/Iqtisod

O‘zbekistonliklar ish haqini istalgan bank kartasiga olishi mumkin bo‘ladi

Iqtisod 18 noyabr, 14:09
 O‘zbekistonliklar ish haqini istalgan bank kartasiga olishi mumkin bo‘ladi

O‘zbekistonda xodimlar ish haqi, mukofot puli va boshqa to‘lovlarni o‘zi tanlagan bank kartasi yoki elektron hamyoniga olishi mumkin bo‘ladi. Buning uchun hisob rekvizitlarini ish joyining buxgalteriyasiga topshirish kifoya.

Xodim va ish beruvchiga xizmat ko‘rsatuvchi banklar bir xil bo‘lishi shart emas. Turli banklar o‘rtasidagi to‘lovlarni Markaziy bankning yangi «Mablag‘larni taqsimlash markazi» taqsimlaydi.

Dastlab tizim xususiy korxonalar va ularning xodimlari uchun ishlaydi. Keyingi bosqichda unga budjet tashkilotlarini ham ulash rejalashtirilgan. Markaziy bank ikkinchi bosqich qachon boshlanishini hozircha ma’lum qilmagan.

Ish haqi uchun alohida karta shart bo‘lmaydi

Hozir kompaniyalar odatda bitta bank bilan ish haqi loyihasi bo‘yicha shartnoma tuzadi. Xodimlar boshqa bank xizmatlaridan foydalanayotgan bo‘lsa ham, maosh olish uchun ish beruvchi tanlagan bankda karta ochadi.

Ko‘pchilik ish haqi tushganidan keyin pulni o‘zining asosiy kartasiga o‘tkazadi. Bank tarifiga qarab, bunday o‘tkazma uchun komissiya olinishi mumkin.

Yangi tizim ish haqini kompaniya tanlagan bankka bog‘lash amaliyotini bekor qiladi. Xodim tariflar, mobil ilovaning qulayligi, bankomatlar soni va kerakli xizmatlarni hisobga olib, bankni o‘zi tanlaydi.

«Mablag‘larni taqsimlash markazi»da ro‘yxatdan o‘tish yoki maxsus hisob ochish talab etilmaydi. Xodim amaldagi kartasi yoxud elektron hamyonining rekvizitlarini buxgalteriyaga beradi. Keyinchalik boshqa bankni tanlasa, yangi rekvizitlarni taqdim etadi.

Karta yoki elektron hamyon xodimning o‘z nomida bo‘lishi kerak. Maoshni qarindosh yoki boshqa shaxs hisobiga yuborish mumkin emas.

Pul turli banklarga qanday o‘tkaziladi?

Ish beruvchi xodimlar haqidagi ma’lumotlar, to‘lov summalari va oluvchilarning rekvizitlari ko‘rsatilgan yagona elektron reyestr tuzadi. Kompaniyaga xizmat ko‘rsatuvchi bank hujjatni elektron raqamli imzo bilan tasdiqlab, «Mablag‘larni taqsimlash markazi»ga yuboradi.

Tizim ma’lumotlarni tekshirib, umumiy to‘lovni xodimlar tanlagan banklar o‘rtasida taqsimlaydi. Har bir bank pulni o‘z mijozining kartasi yoki elektron hamyoniga o‘tkazadi.

Bitta reyestr orqali turli banklarda xizmat ko‘rsatiladigan barcha xodimlarga ish haqi to‘lash mumkin bo‘ladi. Kompaniya har bir bank bilan alohida ish haqi loyihasi bo‘yicha shartnoma tuzmaydi.

Xato rekvizitlar qaytariladi

«Mablag‘larni taqsimlash markazi» Markaziy bankning himoyalangan infratuzilmasida ishlaydi. Elektron reyestrlar yopiq bank tarmog‘i orqali yuboriladi va elektron raqamli imzo bilan tasdiqlanadi.

Pul o‘tkazilishidan oldin tizim oluvchining rekvizitlari va shaxsiy ma’lumotlarini Markaziy bank bazalari bilan solishtiradi. Xato aniqlansa, reyestr tuzatish uchun ish beruvchiga qaytariladi.

Tekshiruv pulning boshqa shaxsga yoki noto‘g‘ri hisobga o‘tkazilishi xavfini kamaytiradi. Shunga qaramay, xodim rekvizitlarni buxgalteriyaga topshirishdan oldin ularni tekshirishi kerak.

Banklar ish haqi loyihalariga tayanib qolmaydi

Kompaniyalar o‘z bankini o‘zgartirmasdan, turli banklarda hisob ochgan xodimlarga maosh to‘lay oladi. Bu ish haqi loyihalari bo‘yicha shartnomalar va to‘lov hujjatlari sonini kamaytiradi.

Bank bilan yirik ish beruvchi o‘rtasidagi shartnoma endi korxonaning barcha xodimlari aynan shu bankda karta ochishini kafolatlamaydi. Mijoz tanlovi tariflar, xizmat sifati, mobil ilova va boshqa bank mahsulotlariga ko‘proq bog‘liq bo‘ladi.

Tizim Prezidentning 2025-yil 27-noyabrdagi PQ-359-son qarori asosida yaratilmoqda. Hujjatda fuqarolarga ish haqi olinadigan bankni erkin tanlash imkonini berish va to‘lov xizmatlari bozorida raqobatni kuchaytirish belgilangan.

Loyiha avval Taqsim nomi bilan tilga olingan. Uni 2026-yil 30-iyunda ishga tushirish rejalashtirilgan, biroq texnik muammolar va ayrim tijorat banklarining integratsiyaga tayyor emasligi sabab muddat kechiktirilgan.

2240

Telegramga obuna böling

Sönggi yangiliklar bilan tanişing

→