The Amazing Race va Expedition Unknown O‘zbekistonda suratga olinishi mumkin

Dunyo 17 noyabr, 17:53
 The Amazing Race va Expedition Unknown O‘zbekistonda suratga olinishi mumkin

O‘zbekiston Amerikaning mashhur The Amazing Race va Expedition Unknown teledasturlarini mamlakatda suratga olish imkoniyatini muhokama qilmoqda. Dastlabki muzokaralar Los-Anjelesda o‘tkazilgan American Film Market xalqaro ko‘rgazmasida bo‘lib o‘tdi.

Ko‘rgazmadagi O‘zbekiston stendiga The Amazing Race loyihasi yaratuvchisi, amerikalik prodyuser va rejissyor Bertram van Munster tashrif buyurdi. Uchrashuvda dasturning epizodlaridan birini O‘zbekistonda suratga olish imkoniyati ko‘rib chiqildi.

Hozircha gap dastlabki muzokaralar haqida bormoqda. Suratga olish bo‘yicha yakuniy qaror, ehtimoliy manzillar va muddatlar e’lon qilinmagan.

The Amazing Race — ishtirokchilar turli mamlakatlarga sayohat qilib, belgilangan vazifalarni bajaradigan sarguzasht realiti-shousi. Dastur AQShning CBS telekanalida qariyb 25 yildan beri namoyish etiladi va 39 mavsumdan iborat. Loyiha shu vaqt davomida 15 ta Emmy mukofotini qo‘lga kiritgan hamda 108 marta ushbu mukofotga nomzod bo‘lgan.

Shou yaratuvchisi Bertram van Munsterning o‘zi esa o‘nta Emmy mukofoti sohibi hisoblanadi.

Discovery dasturini suratga olish masalasi ham muhokama qilindi

American Film Market doirasida Discovery telekanalining Expedition Unknown dasturini O‘zbekistonda suratga olish imkoniyati ham ko‘rib chiqildi.

Xorijiy teledasturlarni mamlakatga jalb qilish O‘zbekistonni xalqaro suratga olish maydoni sifatida tanitishi mumkin. Bunday loyihalar mahalliy studiyalar, texnik mutaxassislar, tarjimonlar, transport va turizm xizmatlariga ham qo‘shimcha buyurtmalar yaratadi.

Beshta o‘zbek loyihasi AQSh bozoriga olib chiqilishi mumkin

Ko‘rgazmada O‘zbekistonda ishlab chiqarilgan kino va telekontentni Amerika bozoriga chiqarish masalasi ham muhokama qilindi.

Xalqaro kino va telemahsulotlar distribyutsiyasi bilan shug‘ullanuvchi Cactus Tree Entertainment kompaniyasi 2027-yilda O‘zbekistondan tanlangan beshta istiqbolli loyihani AQShdagi ehtimoliy xaridorlarga taqdim etishi mumkin.

Xabarda kompaniya FOX, Disney va Netflix kabi telekanal va platformalar bilan ishlashi qayd etilgan. Bu o‘zbek filmlari yoki dasturlari ushbu kompaniyalar tomonidan sotib olingani yoki ularning platformalarida namoyish etilishi tasdiqlanganini anglatmaydi. Hozircha gap kontentni distribyutor orqali xalqaro bozorga taklif qilish haqida bormoqda.

Mualliflik huquqi egalari bilan dastlabki kelishuvlarni 2027-yil 4–5-fevral kunlari Toshkentda o‘tkaziladigan Tashkent Content Market xalqaro yarmarkasida rasmiylashtirish ko‘zda tutilgan.

Tashkent Content Market nima?

Tashkent Content Market kino, televideniye, raqamli media, animatsiya va kreativ sanoat vakillarini birlashtiradigan xalqaro biznes maydonidir.

Unda kontent yaratuvchilar, telekanallar, striming platformalari, distribyutorlar va investorlar o‘rtasida uchrashuvlar o‘tkaziladi. Dasturdan ko‘rgazma, professional forum, namoyishlar, mahorat darslari va B2B muzokaralar o‘rin oladi.

Tashkilotchilar 2027-yilgi tadbirda 50 dan ortiq mamlakatdan 3 mingdan ziyod ishtirokchi qatnashishini kutmoqda. Yarmarka «O‘zekspomarkaz»dagi 5500 kvadrat metr maydonda o‘tkaziladi.

Ishtirokchilar eksponent, xaridor, tashrif buyuruvchi, spiker, hamkor, homiy yoki OAV vakili sifatida Tashkent Content Market rasmiy saytida ro‘yxatdan o‘tishi mumkin.

Tadbirga AQSh va Kanadaning yirik telekanallari, media kompaniyalari hamda distribyutorlarini jalb qilish rejalashtirilgan.

7820

Telegramga obuna böling

Sönggi yangiliklar bilan tanişing

→