Yangiliklar/Siyosat

O‘zbekistonda O‘mon ishtirokida yangi bank tashkil etilishi rejalashtirilmoqda

Siyosat 17 noyabr, 18:07
 O‘zbekistonda O‘mon ishtirokida yangi bank tashkil etilishi rejalashtirilmoqda

O‘zbekiston va O‘mon mamlakatda yangi tijorat bankini tashkil etish bo‘yicha hadli bitim imzoladi. Hujjat Prezident Shavkat Mirziyoyev va O‘mon Sultoni Haysam bin Toriq Ol Saidning Masqatdagi muzokaralari yakunida qabul qilindi.

Bank tashkil etish tashabbusi avval ham muhokama qilingan

Yangi bank ochish masalasi ilk bor ko‘tarilayotgani yo‘q.

2025-yil noyabrida investitsiyalar, sanoat va savdo vaziri Laziz Qudratov O‘zbekiston – O‘mon investitsiya kompaniyasi UzOman bosh direktori Umar Bahrom bilan xorijiy hamkorlar ishtirokida yangi bank tashkil etish tashabbusini muhokama qilgan edi.

Tomonlar o‘sha uchrashuvda loyihaning tashkiliy va tartibga solish bilan bog‘liq jihatlarini ko‘rib chiqqan. Masqatda imzolangan hadli bitim ushbu tashabbusni amalga oshirish yo‘lidagi keyingi bosqich bo‘ldi.

UzOman kapitali 500 mln dollarga yetkaziladi

O‘zbekiston va O‘mon UzOman kompaniyasining ustav kapitalini ikki baravarga oshirib, 500 mln dollarga yetkazishga ham kelishib oldi.

UzOman 2010-yilda O‘zbekistondagi qo‘shma loyihalarni moliyalashtirish maqsadida tashkil etilgan. Kompaniyaning 75 foiz ulushi O‘mon Investitsiyalar agentligiga, 25 foizi esa O‘zbekiston Tiklanish va taraqqiyot jamg‘armasiga tegishli.

Kapitalning oshirilishi kompaniyaning qo‘shma loyihalarni moliyalashtirish imkoniyatlarini kengaytirishi kutilmoqda.

Ustuvor yo‘nalishlar sifatida quyidagilar belgilangan:

  • energetika;
  • tog‘-kon sanoati;
  • elektrotexnika va kimyo sanoati;
  • transport va logistika;
  • infratuzilma va shaharsozlik;
  • qishloq xo‘jaligi;
  • raqamli texnologiyalar.

O‘zbekiston mintaqaviy investitsiya fondiga qo‘shiladi

Tomonlar O‘zbekiston Tiklanish va taraqqiyot jamg‘armasining O‘mon mablag‘lari ishtirokida tashkil etilgan Markaziy Osiyo va Kavkaz investitsiya fondiga qo‘shilishi bo‘yicha ham kelishuvga erishdi.

Mazkur fond Markaziy Osiyo va Kavkaz mamlakatlaridagi loyihalarni moliyalashtirish uchun qo‘shimcha vosita bo‘lishi ko‘zda tutilgan.

Oddiy pasport egalari vizadan ozod qilinadi

O‘zbekiston va O‘mon umumfuqarolik pasporti egalarini o‘zaro viza talabidan ozod qilish to‘g‘risidagi bitimni ham imzoladi.

Hujjatning kuchga kirish sanasi, vizasiz qolish muddati va boshqa shartlari hozircha ma’lum qilinmagan.

Bitim imzolanishi vizalar darhol bekor qilinganini anglatmaydi. Tomonlar ichki tartib-taomillarni yakunlab, yangi qoidalar kuchga kirgani haqida rasmiy xabar berguniga qadar amaldagi kirish tartibi saqlanadi.

30 dan ortiq hujjat qabul qilindi

Muzokaralarning asosiy siyosiy natijasi O‘zbekiston va O‘mon o‘rtasida Strategik sheriklik to‘g‘risidagi bitim imzolanishi bo‘ldi.

Umuman, tomonlar 30 dan ortiq hujjat almashdi. O‘mon tomoni ma’lumotiga ko‘ra, hujjatlar to‘plamiga:

  • bitta hadli bitim;
  • hamkorlik shartlari to‘g‘risidagi hujjat;
  • oltita sohaviy bitim;
  • bitta hamkorlik dasturi;
  • 21 ta anglashuv memorandumi kiritilgan.

Qo‘shma Ishbilarmonlar kengashi tuziladi

O‘zbekiston va O‘mon ikki mamlakat kompaniyalari o‘rtasida bevosita aloqalarni rivojlantirish uchun qo‘shma Ishbilarmonlar kengashini tashkil etishga kelishdi.

Kengash tadbirkorlarga:

  • ikki mamlakatda biznes hamkorlarni izlash;
  • investitsiya takliflarini muhokama qilish;
  • qo‘shma loyihalarni tayyorlash;
  • ularni amalga oshirishda yuzaga keladigan masalalarni hal etishda yordam berishi kutilmoqda.

Shuningdek, O‘zbekiston Investitsiyalar, sanoat va savdo vazirligi hamda O‘mon Investitsiyalar agentligi o‘rtasida hamkorlik dasturi qabul qilindi.

O‘zbekiston xalqaro islom akademiyasi Sulton Qobus universiteti bilan, Islom sivilizatsiyasi markazi esa O‘mon Milliy muzeyi bilan hamkorlik qiladi.

Bank loyihasi va boshqa kelishuvlarning amaliy muddatlari hujjatlarning to‘liq matni e’lon qilingach, ichki tartib-taomillar yakunlangach hamda alohida loyihalar tasdiqlangach ma’lum bo‘ladi.

8390

Telegramga obuna böling

Sönggi yangiliklar bilan tanişing

→