Yangiliklar/Siyosat

O‘zbekistonda kiberfiribgarlikka qarshi tun-u kun ishlaydigan markaz tashkil etish rejalashtirilmoqda

Siyosat 16 noyabr, 15:43
 O‘zbekistonda kiberfiribgarlikka qarshi tun-u kun ishlaydigan markaz tashkil etish rejalashtirilmoqda

O‘zbekistonda kiberfiribgarlik va pul o‘g‘irlash holatlariga tezkor javob beruvchi, kecha-yu kunduz faoliyat yuritadigan markaz tashkil etish rejalashtirilmoqda. Uning ishiga Ichki ishlar vazirligi hamda tijorat banklarini jalb qilish ko‘zda tutilgan.

Bu vazifa prezidentning 2026-yil 10-noyabrdagi PF-242-sonli farmonida belgilangan. Hujjat 11-noyabrdan kuchga kirgan.

Farmonga muvofiq, 2026-yil dekabriga qadar 24/7 rejimida ishlaydigan tezkor markaz faoliyatini tartibga soluvchi normativ-huquqiy hujjat loyihasi ishlab chiqilishi kerak.

O‘g‘irlangan pul harakati kuzatiladi

Yangi mexanizm kibermakondagi firibgarlik yoki o‘g‘rilik haqida xabar kelib tushganidan keyin pul mablag‘larining keyingi harakatini kuzatish imkonini berishi kerak.

Ichki ishlar organlari va banklarning tezkor hamkorligi orqali o‘tkazmalar haqidagi ma’lumotlarni aniqlash, pulning boshqa hisoblarga chiqarilishini kuzatish va zarur choralarni tezroq ko‘rish rejalashtirilmoqda.

Biroq farmonda shubhali tranzaksiyalarni bloklash shartlari, murojaatni tekshirish muddati va o‘g‘irlangan pulni qaytarish tartibi batafsil ko‘rsatilmagan. Bu masalalar ishlab chiqiladigan normativ-huquqiy hujjatda aniqlashtirilishi kerak.

Markazning tashkil etilishi firibgarlik haqida xabar berish bilan pulning avtomatik ravishda qaytarilishini anglatmaydi. Mablag‘ni qaytarish imkoniyati murojaat qanchalik tez yuborilgani, pul qaysi hisoblar orqali o‘tkazilgani va uni cheklash uchun huquqiy asoslar mavjudligiga bog‘liq bo‘ladi.

Amaldagi tartib bo‘yicha kiberfiribgarlikka duch kelgan shaxs imkon qadar tezroq o‘z banki va ichki ishlar organlariga murojaat qilishi lozim. Bankka operatsiya vaqti, miqdori, tranzaksiya rekvizitlari va mablag‘ni qabul qilgan tomon haqidagi mavjud ma’lumotlarni taqdim etish muhim.

Kiberjinoyatchilikka qarshi choralar kuchaytiriladi

PF-242-sonli farmonda kiberjinoyatchilik, giyohvandlik va odam savdosining oldini olish choralarini kuchaytirish sud mustaqilligi hamda qonun ustuvorligini ta’minlashga qaratilgan milliy dasturning asosiy yo‘nalishlaridan biri sifatida belgilangan.

Hujjatda huquqiy tarbiya va huquqiy savodxonlikni umumta’lim maktablaridan boshlab tizimli yo‘lga qo‘yish, shuningdek, xotin-qizlar va bolalar huquqlarini kamsitishga qarshi kurashni kuchaytirish ham nazarda tutilgan.

Odam savdosi jabrlanuvchilariga yordam berish soddalashtiriladi

Farmon odam savdosidan jabrlangan shaxslarga yordam ko‘rsatish tartibini soddalashtirishni ham nazarda tutadi.

Jabrlanuvchilarni xavfsiz joyga joylashtirish, ularga tibbiy yordam ko‘rsatish va zarur hollarda tarjimon xizmatini taqdim etish rejalashtirilmoqda.

Ushbu xizmatlardan foydalanish tartibi, mas’ul tashkilotlar va yordam ko‘rsatish muddatlari farmon ijrosi doirasida ishlab chiqiladigan hujjatlarda batafsil belgilanishi kutilmoqda.

9200

Telegramga obuna böling

Sönggi yangiliklar bilan tanişing

→