O‘zbekistonda mobil raqamlarni elektron auksion orqali sotish imkoniyati yaratildi

O‘zbekiston respublika tovar-xom ashyo birjasida (UZEX) mobil aloqa raqamlarini elektron savdolar orqali sotish imkoniyati yaratildi. Yangi xizmat jismoniy va yuridik shaxslarga o‘zlari foydalanayotgan raqamlarni sotuvga qo‘yish imkonini beradi.

Savdolar mobilraqam.uzex.uz platformasi orqali amalga oshiriladi. Foydalanuvchilar raqamlarini auksionga qo‘yishi yoki «Tezkor bitim» funksiyasidan foydalanib, auksion yakunlanishini kutmasdan sotishi mumkin.

Savdoda ishtirok etish tartibi qanday?

Avval sotuvchi va xaridor elektron tizimda bepul ro‘yxatdan o‘tadi. Keyin sotuvchi mobil raqamini savdoga joylashtiradi. Xaridor esa platformadagi katalogdan o‘ziga ma’qul raqamni tanlab, auksionda qatnashishi yoki «Tezkor bitim» orqali kelishuvga erishishi mumkin.

Savdoda qatnashish uchun sotuvchi raqam qiymatining 1 foizi, xaridor esa 3 foizi miqdorida zakalat kiritadi. Bu mablag‘lar bitim bo‘yicha tomonlarning majburiyatlarini bajarishini ta’minlash uchun talab etiladi.

Savdo g‘olibi aniqlangach, mobil raqamni qayta rasmiylashtirish mumkin. Buning uchun my.gov.uz portali orqali onlayn xizmatdan foydalanish yoki tegishli mobil operator ofisiga murojaat qilish kerak. Raqamni qayta rasmiylashtirish yakunlangach, UZEX sotuvchiga pul mablag‘ini o‘tkazadi.

Yangi tizim qanday imkoniyatlar beradi?

Platforma orqali foydalanuvchilar mobil raqamlarini masofadan turib savdoga qo‘yishi, mavjud raqamlar katalogini ko‘rib chiqishi va o‘ziga keraklisini xarid qilishi mumkin. Barcha jarayonlar yagona elektron tizim orqali amalga oshiriladi.

«Tezkor bitim» funksiyasi esa auksion muddati tugashini kutmasdan savdoni yakunlash imkonini beradi.

Shu bilan birga, foydalanuvchilar mobil operatorlar orqali ham o‘zlari istagan raqamni onlayn buyurtma qilishlari mumkin.

Yangi xizmat mobil raqamlar savdosida ochiqlik va shaffoflikni ta’minlash, elektron savdo imkoniyatlarini kengaytirish hamda foydalanuvchilar vaqtini tejashga qaratilgan.

Mobil raqamingizni sotish yoki yangi raqam xarid qilish uchun mobilraqam.uzex.uz platformasining «Shaxsiy raqamlar savdosi» bo‘limidagi katalog bilan tanishishingiz mumkin.