O‘zbekistonlik robototexniklar jahon turniridagi g‘alabasi uchun mukofotlandi

Prezident Shavkat Mirziyoyev Janubiy Koreyaning Inchxon shahrida o‘tkazilgan FIRST Global Challenge xalqaro robototexnika turnirida g‘olib bo‘lgan O‘zbekiston terma jamoasi vakillarini davlat mukofotlari bilan taqdirladi.

O‘zbekiston jamoasi qariyb 190 davlatdan kelgan iqtidorli yoshlar o‘rtasida rekord natija qayd etib, jahon chempioni bo‘ldi.

Terma jamoa bosh murabbiyi Ziyodullo Butaxonov «Sodiq xizmatlari uchun» medali bilan taqdirlandi.

«Kelajak bunyodkori» medali quyidagilarga berildi:

• Ibrohim Salomov, terma jamoa sardori;
• Abdulloh Abdujabborov, texnik murabbiy;
• Shohruxbek Akbarov, jamoa a’zosi;
• Akbarshoh Qosimov, jamoa a’zosi;
• Ayubxon Mirahmedov, jamoa a’zosi;
• Umarbek Pardayev, jamoa a’zosi;
• Shukrullo Sodiqov, jamoa a’zosi;
• Mahkambek Teshabayev, jamoa a’zosi;
• Safina Teshabayeva, jamoa menejeri;
• Jasurbek Tojiquziyev, jamoa a’zosi;
• Bahodir O‘rmonov, jamoa a’zosi;
• Xondamir O‘rmonov, jamoa a’zosi;
• Hasanxon Yusupxo‘jayev, jamoa menejeri.

Jami 14 nafar murabbiy, ishtirokchi va menejer davlat mukofotiga sazovor bo‘ldi.

FIRST Global Challenge yoshlar o‘rtasidagi xalqaro robototexnika musobaqasidir. Ishtirokchilar robotlarni loyihalashtiradi va dasturlaydi, so‘ng ular yordamida maxsus maydondagi vazifalarni bajaradi. Turnir muhandislik ko‘nikmalari, jamoaviy ish va davlatlar o‘rtasidagi hamkorlikni rivojlantirishga qaratilgan.