O‘zbekistonda qimmatli qog‘ozlarga sarmoya kiritish bo‘yicha yangi qonun tayyorlanmoqda

O‘zbekistonda «Kapital bozori to‘g‘risida»gi yangi qonun tayyorlanmoqda. U kompaniyalarning aksiyalar, obligatsiyalar va boshqa moliyaviy vositalar orqali sarmoya jalb qilish tartibini belgilaydi.

Qonun loyihasi Oliy Majlis Qonunchilik palatasida birinchi o‘qishdan o‘tgan va ikkinchi o‘qishga tayyorlanmoqda. QL-260-sonli loyiha 2026-yil 27-iyulda ro‘yxatdan o‘tkazilgan.

Hujjat sukuk chiqarishga ruxsat beradi. Sukuk islomiy moliya qoidalariga mos qimmatli qog‘oz bo‘lib, odatiy foiz to‘lashni nazarda tutmaydi. Investor daromadni ijara, savdo yoki sheriklik asosida olishi mumkin.

Shuningdek, obligatsiyalarning yangi turlari va boshqa moliyaviy vositalar uchun qoidalar belgilanadi. Bu kompaniyalarga rivojlanish uchun faqat bank krediti emas, balki kapital bozori orqali ham mablag‘ jalb qilish imkonini beradi.

Investorlarni bilim va tajribasiga qarab ikki guruhga ajratish rejalashtirilgan. Yetarli tajribaga ega bo‘lmagan fuqarolarning murakkab va xavfli moliyaviy vositalardan foydalanishi cheklanishi mumkin.

Obligatsiya va sukuk egalarining manfaatlarini himoya qiluvchi vakil instituti ham joriy etiladi. U qimmatli qog‘ozlarni chiqargan kompaniya o‘z majburiyatlarini vaqtida bajarayotganini nazorat qiladi.

Dividendlar va obligatsiyalar bo‘yicha to‘lovlarni Qimmatli qog‘ozlar markaziy depozitariysi orqali amalga oshirish rejalashtirilgan. Bu hisob-kitoblarni shaffoflashtirish va to‘lovlarning kechikish xavfini kamaytirishga xizmat qiladi.

Yangi qonun o‘zbek kompaniyalarining xorijiy fond bozorlariga chiqishini hamda chet el qimmatli qog‘ozlarini O‘zbekistonda joylashtirishni osonlashtirishi kutilmoqda. Qonun loyihasining ikkinchi o‘qish sanasi hozircha e’lon qilinmagan.