2022–2025 yillarda O‘zbekistonda 14 yoshgacha bo‘lgan bolalarni zo‘rlash bo‘yicha 445 ta jinoyat ishi qo‘zg‘atilgan

Oliy Majlis Qonunchilik palatasida bolalarni zo‘ravonlikdan himoya qilishga qaratilgan qonun loyihasi muhokama qilindi.

Yig‘ilishda Demokratik institutlarni rivojlantirish va fuqarolik jamiyati masalalari qo‘mitasi raisi Gulruh Agzamova 2022–2025 yillarda 14 yoshga to‘lmagan bolalarni zo‘rlash holatlari bo‘yicha 445 ta jinoyat ishi qo‘zg‘atilganini ma’lum qildi.

Statistikaga ko‘ra:

• 2022-yilda — 85 ta;
• 2023-yilda — 108 ta;
• 2024-yilda — 129 ta;
• 2025-yilda — 123 ta holat qayd etilgan.

Qonun loyihasi bolalarga nisbatan sodir etilgan eng og‘ir jinsiy jinoyatlar uchun javobgarlikni kuchaytirishni nazarda tutadi. Xususan, 14 yoshga to‘lmagan bolani zo‘rlash uchun umrbod ozodlikdan mahrum qilish jazosi joriy etilishi taklif qilinmoqda.

Shuningdek, hujjatda:

• bolalarga qarshi jinsiy jinoyatlar bo‘yicha da’vo muddatini bekor qilish;
• tergov va sudlarda voyaga yetmaganlarning huquqiy himoyasini kuchaytirish;
• jabrlangan bolalarga bepul yuridik yordam ko‘rsatish kabi normalar ham nazarda tutilgan.

Muhokamalar Namangan viloyatidagi 5 yoshli bog‘cha tarbiyalanuvchisiga nisbatan zo‘ravonlik ishi ortidan yanada dolzarb tus oldi. Qonun loyihasi deputatlar tomonidan birinchi o‘qishda qabul qilindi.