Shavkat Mirziyoyev Qozog‘istondagi fojia munosabati bilan hamdardlik bildirdi

O‘zbekiston Prezidenti Shavkat Mirziyoyev Kaspiy dengizi hududida harbiy mashg‘ulotlar vaqtida harbiy xizmatchilar halok bo‘lgani munosabati bilan Qozog‘iston Prezidenti Qosim-Jo‘mart Toqayev va qozog‘istonliklarga hamdardlik bildirdi.

Davlat rahbari halok bo‘lganlarning oila a’zolari va yaqinlariga chuqur ta’ziya va madad so‘zlarini yo‘lladi.

Fojia 24-sentabr kuni Qozog‘istonning Mang‘istov viloyatida Harbiy-dengiz kuchlarining rejalashtirilgan o‘quv mashg‘ulotlari vaqtida yuz bergan. Ma’lumotlarga ko‘ra, ob-havoning keskin yomonlashuvi oqibatida bir guruh harbiy xizmatchilar Kaspiy dengiziga olib ketilgan.

Hodisa oqibatida 14 nafar harbiy xizmatchi halok bo‘lgan. Ushbu fojiadan so‘ng Qozog‘istonda 25-sentabr umumxalq motam kuni deb e’lon qilindi.