Shavkat Mirziyoyev Janubiy Koreyaga tashrifini yakunladi

O‘zbekiston prezidenti Shavkat Mirziyoyevning Janubiy Koreyaga davlat tashrifi oliy darajadagi muzokaralar, kelishuvlar paketini imzolash hamda "Markaziy Osiyo — Koreya Respublikasi" ilk biznes-sammitida ishtirok etish bilan yakunlandi.

Seulda davlat rahbari Janubiy Koreya prezidenti Li Chje Myon, Milliy Assambleya spikeri Cho Chjon Shik, Bosh vazir Han Son Suk, shuningdek, yetakchi koreys kompaniyalari va moliyaviy institutlar rahbarlari bilan uchrashuvlar o‘tkazdi.

O‘zbek-koreys biznes-forumi doirasida tomonlar yangi qo‘shma loyihalarni amalga oshirishga start berdi va qator investitsiyaviy hamda savdo-iqtisodiy kelishuvlarni imzoladi. Tashrifning asosiy voqealaridan biri "Markaziy Osiyo — Koreya Respublikasi" ilk biznes-sammiti bo‘lib, unda Markaziy Osiyoning besh davlati va Janubiy Koreya yetakchilari ishtirok etdi.

Forumda so‘zlagan prezident mamlakatlar o‘rtasidagi hamkorlik yangi bosqichga chiqayotganini va u iqtisodiyotlarning o‘zaro bir-birini to‘ldirishi tamoyili asosida qurilishi lozimligini ta’kidladi. Uning aytishicha, koreys kompaniyalari Markaziy Osiyoni 80 mln nafardan ortiq aholiga ega, talab o‘sib borayotgan va salmoqli resurs salohiyatiga ega yagona bozor sifatida ko‘rishi kerak.

Prezident sanoat kooperatsiyasiga alohida e’tibor qaratdi. U O‘zbekistonning mineral-xomashyo bazasi kamida 3 trln dollarga baholanayotganini, yaqin yillarda esa tanqidiy muhim minerallar sohasida umumiy qiymati 4 mlrd dollardan ortiq bo‘lgan 120 ta loyihani amalga oshirish rejalashtirilayotganini qayd etdi.

Davlat rahbari Janubiy Koreyaning moliyaviy va texnologik imkoniyatlaridan foydalangan holda xomashyoni chuqur qayta ishlash va yuqori texnologiyali mahsulotlar ishlab chiqarishga e’tibor qaratishni taklif etdi. Nutqning alohida qismi innovatsiyalar va raqamli texnologiyalarga bag‘ishlandi. Shavkat Mirziyoyev koreys kompaniyalarini sun’iy intellekt sohasidagi loyihalarda ishtirok etishga taklif qilib, SI joriy etilishi besh yil ichida mintaqaning har bir mamlakati iqtisodiyoti uchun kamida 10 mlrd dollarlik qo‘shilgan qiymatni ta’minlashga qodirligini ta’kidladi. Shu munosabat bilan u Qoraqalpog‘istonda investorlar uchun kengaytirilgan imtiyozlarga ega sun’iy intellekt data-markazlari uchun maxsus xab tashkil etilgani haqida eslatib o‘tdi.

Shuningdek, mikroelektronika va yarimo‘tkazgichlar sohasidagi loyihalar taqdim etildi. Nurafshonda Kelajak texnologiyalari markazi bazasida yarimo‘tkazgichlar, sanoat mikroelektronikasi va yangi materiallarni loyihalash hamda sinovdan o‘tkazish bo‘yicha qo‘shma markaz tashkil etilmoqda.

Prezident hamkorlikning istiqbolli yo‘nalishlari qatorida biotexnologiyalar va farmatsevtikani qayd etdi. Uning so‘zlariga ko‘ra, O‘zbekistonda dori vositalari va tibbiy buyumlar bozori hajmi allaqachon 3 mlrd dollarga yetgan. Shu munosabat bilan ilmiy tadqiqotlar, klinik baza va ishlab chiqarishni birlashtiradigan biofarmatsevtik klaster yaratish taklif etildi.

Prezident Markaziy Osiyo muhandislari va mutaxassislarini tayyorlash bo‘yicha yagona dasturni ishga tushirish, koreys universitetlari, laboratoriyalari va yuqori texnologiyali kompaniyalarida stajirovkalarni tashkil etish tarafdori ekanini bildirdi. Koreys investorlariga, shuningdek, misni qayta ishlash, elektrotexnika uskunalarini ishlab chiqarish, avtokomponentlar va elektromobillar uchun butlovchi qismlarni mahalliylashtirish, robototexnika, gidroenergetika, energiya jamg‘arish tizimlari, elektr tarmoqlarini modernizatsiya qilish, shuningdek, transport va shahar infratuzilmasi sohalarida loyihalarni amalga oshirish taklif qilindi.

Davlat tashrifining sermazmun dasturi yakunida Shavkat Mirziyoyev Toshkentga jo‘nab ketdi.