Toshkentda Abdulla Qodiriy koʻchasi boʻylab gastrokoʻcha tashkil etiladi

Toshkent shahri hokimiyati Shayxontohur tumanidagi Abdulla Qodiriy ko‘chasida gastronomik zona tashkil etilishini ma’qulladi. Loyiha davlat-xususiy sheriklik (DXSh) doirasida amalga oshiriladi.

Poytaxt hokimining qaroriga ko‘ra, Tashkent Invest kommunal kompaniyasi loyiha zonasi hududidagi yer uchastkalarini investorlar ixtiyoriga 10 yilgacha muddatga berish huquqiga ega bo‘ladi.

Loyihani amalga oshirish uchun umumiy maydoni qariyb 0,5 ga bo‘lgan sakkizta yer uchastkasi nazarda tutilgan. Ular Jangoh massividagi №9 va №10 uylar yaqinida, shuningdek, Ts-13 (Labzak) massividagi №9 va №35 uylar yonida joylashgan. Uchastkalar maydoni 61 dan 1473 kvadrat metrgacha.

Uchastkalarni E-auksion platformasi orqali elektron savdolarga chiqarish rejalashtirilgan. Har bir lotning boshlang‘ich qiymati yer solig‘i stavkasidan kelib chiqib hisoblanadi va 321,5 mln so‘mni tashkil etadi.

$1 mln gacha investitsiya

Savdolar g‘olibi hududni rivojlantirishga ekvivalentda $1 mln gacha, biroq kamida 11 mlrd so‘m investitsiya kiritishi kerak bo‘ladi. Investitsiya majburiyatlarini bajarish uchun DXSh bitimi ro‘yxatdan o‘tkazilgan paytdan boshlab uch oy vaqt beriladi.

Gastroko‘cha hududida investor quyidagilarni joylashtirishi mumkin:

• zamonaviy umumiy ovqatlanish shoxobchalari;
• yengil, kapital bo‘lmagan konstruksiyalardan savdo obyektlari;
• avtoturargohlar;
• kamida bitta jamoat hojatxonasi.

Loyiha ishga tushirilganidan keyin olti oy ichida, ijtimoiy reyestrlarga kiritilgan fuqarolar uchun to‘rtta o‘rinni ham qo‘shgan holda, kamida 20 ta ish o‘rni yaratish lozim.

Wi‑Fi, videokuzatuv va tadbirlar

Loyihada hududni obodonlashtirish ham ko‘zda tutilgan. Investor videokuzatuv kameralarini o‘rnatishi, bepul Wi‑Fi tashkil qilishi, dekorativ yoritish, o‘rindiqlar va shahar muhitining boshqa elementlarini joylashtirishi shart.

Obyektlarni joylashtirish sxemasi Toshkent hokimiyati bilan kelishilishi kerak. Barcha ishlar arxitektura, sanitariya, ekologiya va yong‘in xavfsizligi talablariga rioya etilgan holda amalga oshiriladi.

Gastroko‘chadan nafaqat kafe va savdo nuqtalarining kundalik faoliyati uchun, balki festivallar hamda mavsumiy tadbirlarni o‘tkazish uchun ham foydalanish rejalashtirilgan. Shu bilan birga, davlat bayramlari va rasmiy tadbirlar vaqtida shahar hokimiyati hududni o‘z ehtiyojlari uchun vaqtincha bo‘shatishi mumkin.

DXSh shartlariga ko‘ra, Tashkent Invest loyiha bo‘yicha sof foydaning 10%ini oladi. To‘lovlar har yili hisobot yilidan keyingi yilning 30 apreliga qadar amalga oshirilishi lozim.