Shaxmat tojining hal qiluvchi bahsi: Sindarov va Gukesh $2,5 mln uchun oʻynaydi

Xalqaro shaxmat federatsiyasi (FIDE) amaldagi chempion Gukesh Dommaraju hamda o‘zbekistonlik grossmeyster Javohir Sindarov o‘rtasida jahon chempioni unvoni uchun o‘tkaziladigan match mukofot jamg‘armasi tafsilotlarini oshkor qildi. Umumiy mukofot jamg‘armasi $2,5 mlnni tashkil etadi.

Reglamentga ko‘ra, har bir partiyadagi g‘alaba uchun shaxmatchi $200 ming miqdorida qo‘shimcha bonus oladi. Mukofot jamg‘armasining qolgan qismi match ishtirokchilari o‘rtasida taqsimlanadi. Agar chempion klassik qism yakuniga ko‘ra 7,5:6,5 yoki 8:6 hisobi bilan aniqlansa, g‘olib $1,3 mln, mag‘lub esa $1,2 mln oladi.

Shaxmat bo‘yicha jahon tojiga match 2026-yil 22-noyabrdan 12-dekabrgacha Jenevada bo‘lib o‘tadi. Shaxmatchilar 14 tagacha klassik partiya o‘tkazishi kerak. Unvonni qo‘lga kiritish uchun 7,5 ochko to‘plash talab etiladi. Agar asosiy qismdan keyin hisob teng bo‘lib qolsa, g‘olib tay-brekda aniqlanadi.

Bo‘lajak qarama-qarshilik allaqachon shaxmat tarixiga kirdi. Match boshlanish paytida ham Sindarov, ham Gukesh 20 yoshda bo‘ladi, bu esa ushbu bahsni shaxmat tarixidagi jahon chempioni unvoni uchun eng yosh matchga aylantiradi. Hindistonlik grossmeyster uchun bu unvonning birinchi himoyasi bo‘ladi, Sindarov esa mutlaq jahon chempioni unvoni uchun matchda o‘ynagan O‘zbekistonning birinchi vakiliga aylanadi.

Ayni paytda 15 sentyabr kuni Samarqandda 46-jahon shaxmat olimpiadasi boshlandi. Turnir ishtirokchilar soni bo‘yicha rekord o‘rnatdi: unda 400 ta jamoa ro‘yxatdan o‘tdi, bu esa bunday darajadagi musobaqalar uchun yangi tarixiy maksimum hisoblanadi. Olimpiada ilk bor Markaziy Osiyoda o‘tkazilmoqda.

O‘zbekistonlik grossmeyster Olimpiadaga 2778 reyting bilan kelmoqda va mamlakat terma jamoasi yetakchisi hisoblanadi; terma jamoa AQSh, Hindiston va Xitoy jamoalari bilan birga medallar uchun asosiy da’vogarlar qatoriga kiradi.