Raqobat qoʻmitasi yoʻlovchilar shikoyatlaridan soʻng WB Taxi’ga soʻrov yubordi

Raqobatni rivojlantirish qo‘mitasi xizmat ko‘rsatish sifatidan norozi bo‘lgan yo‘lovchilar murojaatlaridan so‘ng WB Taxi MChJ manziliga so‘rov yubordi.

Idora ma’lumotlariga ko‘ra, 2026-yil yanvardan avgustgacha bo‘lgan davrda servis ishi bilan bog‘liq qariyb 20 ta murojaat kelib tushgan. Foydalanuvchilar buyurtma rasmiylashtirilgandan keyin haydovchi ko‘rsatilgan manzilga kelmaganini, u bilan bog‘lanish imkoni bo‘lmaganini, operatorlar esa har doim muammoni tezkor hal qilishda yordam bermaganini ma’lum qilgan.

Kompaniya faoliyatini o‘rganish jarayonida Qo‘mita iste’molchilar huquqlarini himoya qilish, elektron tijorat hamda raqamli platformalar faoliyatiga oid qonunchilik talablariga rioya qilishga taalluqli ayrim kamchiliklarga e’tibor qaratdi.

Shu munosabat bilan WB Taxi’ga qonunchilik me’yorlariga rioya qilishni ta’minlash, shuningdek yo‘lovchilar bilan samarali teskari aloqa o‘rnatish uchun sharoit yaratish talabi bilan rasmiy so‘rov yuborildi. Gap servis vakillari bilan tez bog‘lanish va buyurtma bilan bog‘liq muammolar yuzaga kelganda zarur ma’lumotni olish imkoniyati haqida bormoqda.

Idorada ta’kidlanishicha, yo‘lovchilar uchun nafaqat avtomobilning o‘z vaqtida yetib kelishi, balki nizoli vaziyatlar yuzaga kelganda tezkor yordam va izohlarni olish imkoniyati ham muhim.