Oʻqishning birinchi kunida Toshkent metropoliteni 288 mingdan ortiq yoʻlovchini tashidi

O‘zbekiston OTMlarida yangi o‘quv yili boshlanishi bilan Toshkent metropolitenida yo‘lovchilar oqimi keskin oshdi. Metroning 14-sentabr kuni ish boshlaganidan keyingi dastlabki besh soatida uning xizmatlaridan 288 187 kishi foydalandi.

Toshkent metropoliteni ma’lumotlariga ko‘ra, 05:00 dan 10:00 gacha eng ko‘p yo‘lovchi «Chinor», «Sergeli», «Choshtepa», «Olmazor», «Chilonzor», «Buyuk ipak yo‘li», «Do‘stlik» va «Beruniy» bekatlarida qayd etildi.

Yo‘lovchilar oqimi ortganiga xizmat ko‘rsatish uchun tig‘iz soatlarda poyezdlar harakati oralig‘i qisqartirildi:

• Chilonzor yo‘nalishida — 1,5-2 daqiqagacha;
• «O‘zbekiston» yo‘nalishida — 3 daqiqagacha;
• Yunusobod yo‘nalishida — 4 daqiqagacha;
• yer usti halqa yo‘nalishida — 7-8 daqiqagacha.

Metropolitenda yo‘lovchilar oqimi doimiy ravishda kuzatib borilayotgani va zarurat tug‘ilganda yo‘lovchilarning xavfsizligi hamda qulayligini ta’minlash uchun poyezdlar harakati oralig‘i moslashtirilishi davom ettirilishi qayd etildi.