Nepalda toshqinlar 1380 dan ortiq odamning hayotiga zomin boʻlgani sababli milliy motam e’lon qildi

7-sentabr kuni Nepal hukumati halokatli suv toshqinlari qurbonlari xotirasiga milliy motam e’lon qildi. Mamlakatdagi davlat idoralari va xorijdagi diplomatik vakolatxonalarda bayroqlar yarim tushirilgan.

Fojiaga 26-avgust kuni Nepal va Tibet chegarasidagi Himolay hududida muzlikning uzilishi sabab bo‘ldi. Natijada yuzaga kelgan ulkan loyqa va tosh oqimi Bhotekoshi daryosiga qulab, keng ko‘lamli vayronagarchiliklarni keltirib chiqardi. So‘nggi ma’lumotlarga ko‘ra, kamida 1380 kishi halok bo‘lgan, 5500 dan ortiq odam esa bedarak yo‘qolgan.

Qutqaruvchilar og‘ir sharoitlarga qaramay ishlarni davom ettirmoqda. Oxirgi kunlarda to‘rt nafar tirik qolgan inson qutqarib olindi. Ular orasida gidroelektr stansiyasi tunnelida qolib ketgan Xitoy fuqarosi hamda vayronalar ostidan chiqarilgan nepallik ayol ham bor.

Hozirda asosiy e’tibor 12 ta gidroenergetika obyektiga qaratilgan bo‘lib, u yerda qariyb 900 nafar ishchi bedarak yo‘qolgan. Taxminan 500 nafari tunnel va yerosti inshootlarida qolib ketgani taxmin qilinmoqda. Qidiruv-qutqaruv amaliyotlarida Hindiston, Xitoy, Janubiy Koreya va AQSHdan kelgan maxsus guruhlar ham ishtirok etmoqda.

Katmanduda bedarak yo‘qolganlarning yaqinlari hukumat binolari oldida to‘planib, qutqaruv ishlarini jadallashtirishni talab qildi. Ularning aytishicha, ayrim obyektlar bo‘yicha deyarli ikki haftadan buyon rasmiy ma’lumot berilmagan.

Nepal prezidenti Ram Chandra Paudel dushanba kuni ofatdan eng ko‘p zarar ko‘rgan hududlarga tashrif buyurib, talafotlar ko‘lamini o‘rganmoqda.