Shavkat Mirziyoyev 7–8-sentabr kunlari Serbiyaga tashrif buyuradi

Prezident Shavkat Mirziyoyev Serbiya prezidenti Aleksandr Vuchichning taklifiga binoan 7–8-sentabr kunlari ushbu mamlakatga rasmiy tashrif bilan boradi.

Tashrif doirasida Belgradda oliy darajadagi muzokaralar o‘tkazilishi, shuningdek, ikki davlat rasmiylari va ishbilarmon doiralari ishtirokida biznes-forum tashkil etilishi rejalashtirilgan.

Muzokaralarda O‘zbekiston va Serbiya o‘rtasidagi hamkorlikni yanada rivojlantirish masalalari muhokama qilinadi. Savdo-iqtisodiy aloqalarni kengaytirish, investitsiyalarni jalb etish hamda transport, mashinasozlik, yengil va oziq-ovqat sanoati, qishloq xo‘jaligi, farmatsevtika va axborot texnologiyalari sohalaridagi qo‘shma loyihalarga alohida e’tibor qaratiladi.

Tashrif yakunida hukumatlar va idoralar o‘rtasida qator hujjatlarni imzolash kutilmoqda.