Oʻzbekiston koloniyalari onlayn xarid qilishni yoʻlga qoʻyishni rejalashtirmoqda

O‘zbekiston Ichki ishlar vazirligi ozodlikdan mahrum etish jazosi ijro etiladigan muassasalarning ichki tartib qoidalariga o‘zgartirishlar kiritishni taklif qildi. Loyiha mahkumlarga ruxsat etilgan mahsulot va buyumlarni xarid qilish tartibini soddalashtirishni nazarda tutadi.

Endilikda muassasalar hududida oʻrnatilgan infokiosklar, shuningdek, veb-saytlar va mobil ilovalardan foydalangan holda oziq-ovqat mahsulotlari, zaruriy buyumlar va boshqa ruxsat etilgan tovarlarni xarid qilish mumkin boʻladi.

Shu bilan birga, muassasalar ma’muriyati xarid qilinayotgan mahsulotlarning tasdiqlangan roʻyxat va qadoqlash talablariga muvofiqligini nazorat qiladi. Xarid qilingan ashyolar soni belgilangan saqlash normasidan oshsa, ular omborga joylashtiriladi. Mahkum bunday tovarlarni ariza berganidan keyin olishi mumkin boʻladi.

Koloniyalarda jazoni oʻtayotgan shaxslar uchun alohida oʻzgartirishlar nazarda tutilgan. Ular uchun ruxsat etilgan tovarlarning ogʻirligi va miqdori boʻyicha joriy cheklovlarni, jumladan, mahsulotlarni saqlash va xarid qilish boʻyicha oylik limitlarni bekor qilish taklif qilinmoqda.

Loyiha, shuningdek, mahkumlarga sotib olishi va oʻzida saqlashi mumkin boʻlgan tovarlar roʻyxatini tasdiqlaydi. Unga non mahsulotlari, makaron mahsulotlari, konservalar, sabzavot va mevalar, yongʻoq va quritilgan mevalar, choy, kofe, shirinliklar, salqin ichimliklar, shuningdek, boshqa bir qator oziq-ovqat mahsulotlari kirdi. Roʻyxatda amaldagi qonunchilikda ruxsat etilgan kantselyariya tovarlari, gugurt va ayrim turdagi tamaki mahsulotlari ham mavjud.