NASA Mars yuzasidagi g‘ayrioddiy yoriqlar suratlarini e’lon qildi

NASA Mars yuzasining yangi suratlarini e’lon qildi. Curiosity marsoxodi tomonidan Valle-Grande hududida olingan tasvirlarda butun vodiy bo‘ylab cho‘zilgan, asalari uyasini eslatuvchi ko‘pburchak shakldagi yoriqlar ko‘rinadi.

Olimlar fikricha, bunday tuzilmalar haroratning keskin o‘zgarishi yoki tuproqning qurishi natijasida yuzaga kelgan bo‘lishi mumkin. Biroq ularning aniq kelib chiqish sababi hozircha noma’lum bo‘lib qolmoqda. 2012-yilda Marsga qo‘ngan Curiosity marsoxodi shu vaqtgacha sayyora yuzasida 37 kilometrdan ortiq masofani bosib o‘tgan. Mutaxassislar uning missiyasi kamida yana o‘n yil davom etishini kutmoqda.