Prezident gaz tanqisligi va narxlar oshishiga yoʻl qoʻymaslikni talab qildi

Prezident Shavkat Mirziyoyev neft-gaz tarmogʻining barqaror ishlashi, aholi va korxonalarni energiya resurslari bilan uzluksiz ta’minlash chora-tadbirlari bilan tanishdi.

Mamlakatimizda sanoat ishlab chiqarishining oʻsishi va iste’molning ortib borayotgani fonida tabiiy gaz va neft mahsulotlariga talab ortib bormoqda. Bu borada ichki bozorni barqaror ta’minlash, zarur zaxiralarni shakllantirish va narxlarning asossiz oshib ketishining oldini olishga alohida e’tibor qaratilmoqda.

Ishlab chiqarish hajmini oshirish uchun avgust oyida 27 ta yangi quduqni ishga tushirish rejalashtirilgan. “Yangi Kultak”, “Niyoz”, “Qoratov”, “Marvarid” va “Tegirmon” konlarida quvvatlarning ishga tushirilishi munosabati bilan qoʻshimcha 887 ming kub metr tabiiy gaz qazib olinishi kutilmoqda.

Prezident quduqlarni burgʻulashdan tortib, ularni gaz transporti tizimiga ulashgacha boʻlgan ishlarning barcha bosqichlarida nazoratni kuchaytirish, energetika va ishlab chiqarish infratuzilmasining uzluksiz ishlashini ta’minlash boʻyicha koʻrsatmalar berdi. Qayta ishlash korxonalarini xomashyo bilan barqaror ta’minlash, ichki bozorda xaridorgir mahsulot ishlab chiqarishni koʻpaytirishga alohida e’tibor qaratilmoqda. Shuningdek, hududlarga energiya resurslarini oʻz vaqtida yetkazib berish, zarur zaxiralarni oldindan shakllantirish vazifasi qoʻyildi.

Narxlar barqarorligini ta’minlash uchun bozorda yetarli miqdorda resurslar ta’minlanishini ta’minlash, talabni qondirish maqsadida birja orqali sotish hajmini oshirish, ishlab chiqarish va logistika xarajatlarini kamaytirish, shuningdek, sun’iy tanqislik va narxlarning asossiz oshib ketishi holatlariga chek qoʻyish topshirildi.

Yigʻilish yakunida “Oʻzbekneftgaz” aksiyadorlik jamiyatiga neft va gaz qazib olish boʻyicha prognoz koʻrsatkichlari bajarilishini ta’minlash topshirildi. Bundan tashqari, yil oxirigacha suyultirilgan gaz qazib olish hajmini 520 ming tonnadan 606 ming tonnagacha oshirish rejalashtirilgan.