Nijnikamskdagi dronlar hujumi qurbonlari bo‘yicha ishchi guruh yo‘lga chiqdi

O‘zbekiston Favqulodda vaziyatlar vazirligi ma’lum qilishicha, Tataristonning Nijnikamsk shahrida dronlar hujumi oqibatida halok bo‘lgan O‘zbekiston fuqarolari bilan bog‘liq vaziyatni o‘rganish uchun Toshkentdan maxsus ishchi guruh yuborildi.

Vazirlik xabariga ko‘ra, ishchi guruh tarkibiga bir qator vazirlik va idoralar vakillari kiritilgan. Dastlabki ma’lumotlarga ko‘ra, Nijnikamskdagi qurilish korxonasida ishlagan sakkiz nafar O‘zbekiston fuqarosi hujum oqibatida halok bo‘lgan. Yana bir necha o‘zbekistonlik turli darajadagi tan jarohatlari bilan shifoxonaga yotqizilgan. Avvalroq Prezident Shavkat Mirziyoyev Rossiyada yuz bergan fojiadan so‘ng maxsus ishchi guruhni voqea joyiga yuborish bo‘yicha topshiriq bergan edi.

Ma’lum bo‘lishicha, hujum qurbonlari orasida Tojikiston fuqarolari ham bor. Tojikiston Tashqi ishlar vazirligi ma’lumotiga ko‘ra, bir nafar Tojikiston fuqarosi halok bo‘lgan, yana ikki kishi jarohat olgan. Ulardan birining ahvoli og‘ir, ikkinchisining jarohatlari yengil ekani qayd etilgan. Tojikiston diplomatik idorasi Ufadagi bosh konsullik Rossiya va Tojikistonning tegishli tashkilotlari bilan doimiy aloqada ekanini ma’lum qildi. Halok bo‘lgan 30 yoshli fuqaroning jasadi barcha zarur tartib-taomillar yakunlangach, Dushanbega yuboriladi.

10-avgust kuni ertalab Tatariston Ukraina dronlari hujumiga uchragan edi. Respublika rahbariyati ma’lumotiga ko‘ra, hodisa oqibatida 13 kishi halok bo‘lgan, 78 kishi tibbiy yordam uchun murojaat qilgan, ulardan 25 nafari shifoxonaga yotqizilgan.