Oʻzbekistonda boshlangʻich sinf oʻqituvchilariga sertifikat uchun 15 foizlik ustama toʻlanadi

Oʻzbekiston Vazirlar Mahkamasining 29-iyuldagi 411-son qarori bilan pedagog kadrlarni milliy attestatsiyadan oʻtkazishning yangi tizimi joriy etildi. Hujjat 30-iyuldan kuchga kirdi.

2026/2027-oʻquv yilidan boshlab boshlangʻich sinf oʻqituvchilari va huquqshunoslar malaka imtihonini topshirib, milliy sertifikatga ega boʻlishlari mumkin. Imtihon natijalariga koʻra oltita darajadagi elektron sertifikat beriladi: A+, A, B+, B, C+, C. Uch yil amal qiladi.

B+ va undan yuqori darajadagi sertifikatga ega boʻlgan oʻqituvchilarga sertifikatning butun amal qilish muddati uchun davlat byudjeti mablagʻlari hisobidan muntazam ish haqining 15 foizi miqdorida oylik ustama toʻlanadi.

Shuningdek, 11 ta xorijiy til: xitoy, koreys, yapon, ispan, italyan, fors, dari, pushtu, urdu, hind va uygʻur tillarida koʻp bosqichli test sinovlari joriy etilmoqda.

Tizim imtihon topshiriqlarini ishlab chiqish, attestatsiyadan oʻtgan oʻqituvchilar reyestrini yuritish, apellyatsiya berish tartibi va davlat xizmatlari uchun haq toʻlashni oʻz ichiga oladi.