Oʻzbekiston bank omonatlari uchun foizlardan 5 foizlik soliq joriy etishni taklif qildi

Iqtisodiyot va moliya vazirligi huzuridagi Fiskal tahlil instituti jismoniy shaxslarning bank omonatlari bo‘yicha foizli daromadlariga 5 foizlik soliq joriy etishni taklif qildi. Bu tashabbus 30-iyul kuni bo‘lib o‘tgan fiskal muloqotda ma’lum qilindi.

1998-yildan buyon depozitlar bo‘yicha foizlar soliqdan ozod etilgan yagona passiv daromad turi hisoblanadi. Shu bilan birga, dividendlarga 5 foiz, ijara, royalti va kapital o‘sishidan olinadigan daromadlarga esa 12 foiz soliq solinadi. Mualliflar depozitlar bo‘yicha foizlarga ham dividendlar kabi 5 foizlik stavka belgilab, soliqqa tortishni tenglashtirishni taklif etmoqda.

Institut hisob-kitoblariga ko‘ra, bu chora byudjetga qariyb 1,4 trln so‘m qo‘shimcha tushum olib keladi. Hisob-kitob jismoniy shaxslarning 170,2 trln so‘mlik omonatlari hajmi, o‘rtacha 16 foizlik stavka hamda taklif etilayotgan 5 foizlik soliq stavkasidan kelib chiqib amalga oshirilgan.

Dalil sifatida xalqaro tajriba keltirilmoqda: omonatlar bo‘yicha foizli daromadlarga soliq Qozog‘iston va Ozarbayjonda (10 foizdan), Hindistonda (10 foiz), Germaniyada (26,4 foiz), Turkiyada (15–40 foiz) amal qiladi. Taklif etilayotgan 5 foizlik stavka dunyodagi eng past stavkalardan biridir. Tashabbusni amalga oshirish uchun Soliq kodeksining 381-moddasiga oʻzgartirishlar kiritish kerak boʻladi.