Toshkent yaqinidagi issiqxonalar uchun soliq 10 barobar oshirilishi mumkin

Oʻzbekistonning Soliq kodeksiga oʻzgartish va qoʻshimchalar kiritish toʻgʻrisidagi qonun loyihasi muhokamaga qo‘yildi. Hujjatda Toshkent shahri va uning atrofida joylashgan bir qator issiqxonalar uchun mol-mulk va yer soligʻi stavkalarini oʻn barobar oshirish koʻzda tutilgan.

Qonun loyihasi hokimiyatning poytaxt atrofidagi havo ifloslanishi muammosini hal qilish boʻyicha uzoq muddatli siyosatidagi navbatdagi qadam boʻldi. Oʻzbekiston Prezidenti 2025-yil noyabr oyida Toshkent shahri va unga tutash hududlardagi barcha issiqxonalarni tabiiy gazga oʻtkazish toʻgʻrisidagi qarorni imzolagan edi. Bungacha issiqxonalarning qariyb 60 foizi asosiy issiqlik manbai sifatida koʻmirdan foydalangan. 2026-yil 1-oktabrdan boshlab Toshkent shahri atrofida yangi issiqxonalar barpo etishni cheklash va issiqxona ob’ektlarini tabiiy-iqlim sharoiti qulayroq hududlarga bosqichma-bosqich koʻchirish rejalashtirilgan.

Toshkent viloyatida issiqxonalarni demontaj qilish va Surxondaryo viloyatiga – Sherobod tumanidagi “Surxon-Agro” erkin iqtisodiy zonasiga berish ishlari boshlab yuborildi. 2026 yil 5 avgustdan issiqxonalarni isitish uchun mazut, bitum va shinalarni yoqish uchun jarimalar joriy etildi. Agroklasterlar tarkibiga kiruvchi issiqxonalar davlatdan subsidiya oladi. Yaponiyaning Sumitomo Corporation kompaniyasi ham issiqxonalarni energiya tejamkor texnologiyalarga, xususan, issiqlik nasoslariga aylantirish loyihasini taklif qildi.

Shunday qilib, soliqlarni oʻn barobar oshirish mulkdorlarni isitish tizimini modernizatsiya qilish yoki fermer xoʻjaliklarini poytaxt hududidan tashqariga koʻchirishga ragʻbatlantirishga qaratilgan.