Shavkat Mirziyoyev Ozarbayjon iqtisodiyot vazirini qabul qildi

Oʻzbekiston Prezidenti Shavkat Mirziyoyev 17-iyul kuni Toshkentga amaliy tashrif bilan kelgan Ozarbayjon iqtisodiyot vaziri Mikoil Jabborovni qabul qildi. Uchrashuv avvalida mehmon Prezidentga Ozarbayjon rahbari Ilhom Aliyevning salomini yetkazdi.

Uchrashuvda Oʻzbekiston-Ozarbayjon strategik sheriklik va ittifoqchilik munosabatlarini, birinchi navbatda, savdo-iqtisodiy sohada rivojlantirish masalalari koʻrib chiqildi. Oʻtgan yili tovar aylanmasi 15 foizga oshdi; 2026 yil boshidan buyon oʻsish taxminan 40% ni tashkil etdi. Tomonlar rivojlanish, energetika, geologiya, logistika, moliya, yoqilgʻi kompleksi, toʻqimachilik va turizm sohalarida, jumladan, qoʻshma investitsiya kompaniyasi ishtirokida qoʻshma loyihalarni amalga oshirmoqda.

Boʻlajak uchrashuvlarga iqtisodiy kun tartibini puxta tayyorlash muhimligi ta’kidlandi. Shu kuni boʻlib oʻtgan Hukumatlararo komissiya va Ishbilarmonlar kengashi yigʻilishlari yakunlariga yuqori baho berildi, shuningdek, rejalashtirilgan ikki mamlakat mintaqalari forumi samaradorligini ta’minlash zarurligi ta’kidlandi.