AQSh Green Cardga arizalarni koʻrib chiqishda soʻnggi uch yil ichida ijtimoiy yordamdan foydalanishni hisobga oladi

AQSh prezidenti Donald Tramp ma’muriyati yashil karta olish qoidalarini kuchaytirmoqda, deb xabar bermoqda Reuters. 2026-yil 18-sentabrdan boshlab immigratsiya xizmati xodimlari arizalarni koʻrib chiqishda arizachining kelajakda davlat yordamiga qaram boʻlib qolish ehtimolini baholaydi.

Agar soʻnggi uch yil ichida arizachi SNAP oziq-ovqat yordami, Medicaid, uy-joy subsidiyalari yoki boshqa shunga oʻxshash ijtimoiy yordam dasturlarini jami 12 oydan ortiq ishlatgan boʻlsa, bu yashil karta olish imkoniyatiga salbiy ta’sir koʻrsatishi mumkin. Biroq, qaror faqat ijtimoiy yordamdan foydalanish fakti asosida qabul qilinmaydi - zobitlar murojaat etuvchining yoshi, sogʻligʻi, daromadi, ma’lumoti, kasbiy mahorati va oilaviy ahvolini ham hisobga oladi.

Tramp ma’muriyatining ta’kidlashicha, oʻzgarishlar oʻz-oʻzini ta’minlay oladigan odamlarga ustuvor ahamiyat berish, hukumatga qaramlikni kamaytirish va soliq toʻlovchilar manfaatlarini himoya qilishga qaratilgan. Immigrantlar huquqlarini himoya qilish tashkilotlari esa, bu oʻzgarishni tanqid qiladi: ular bu kam ta’minlangan oilalarga ta’sir qiladi va muhojirlarni oʻzlari qonuniy huquqqa ega boʻlgan sogʻliqni saqlash va ijtimoiy dasturlardan foydalanishga xalaqit berishi mumkinligini aytishadi.