Abduqodir Husanov 2026-yilgi jahon chempionatida eng tezkor futbolchi deb topildi

O‘zbekiston milliy terma jamoasi himoyachisi Abduqodir Husanov 2026-yilgi jahon chempionatining birinchi turi yakunlariga ko‘ra eng tezkor futbolchilar uchligiga kirdi. FIFA rasmiy statistik ma’lumotlariga ko‘ra, u 36,5 km/soat tezlikka erishib, Norvegiya hujumchisi Erling Holand bilan ikkinchi o‘rinni bo‘lishdi.

Birinchi o‘rinni Avstraliya himoyachisi Jordan Bos egalladi — 36,7 km/soat. U Husanov va Holanddan atigi 0,2 km/soatga tezroq bo‘ldi. Shu bilan birga, Husanov Kilian Mbappe (35,1 km/soat) va Son Hyn Min (35,2 km/soat) kabi futbolchilardan yuqori natija ko‘rsatdi. E’tiborlisi, Husanov va Holand — “Manchester City” klubidagi jamoadoshlar — FIFA reytingida ikkinchi pog‘onani bo‘lishdi.

22 yoshli Husanov Angliya Premyer-ligasi tarixidagi ilk o‘zbekistonlik futbolchi hisoblanadi. U 2025-yil yanvar oyida 40 million yevro evaziga “Manchester City”ga o‘tgan. Jamoa bosh murabbiyi Xosep Gvardiola 2026-yil boshidayoq uni muvaffaqiyatli transfer sifatida baholagan.

Yana bir o‘zbekistonlik futbolchi ham ajralib turdi: SofaScore platformasi ma’lumotiga ko‘ra, yarim himoyachi Abbosbek Fayzullayev birinchi turdagi eng tezkor o‘yinchilardan biri bo‘lib, 36 km/soat tezlikka chiqdi. Aynan u O‘zbekiston terma jamoasining jahon chempionatlari tarixidagi ilk golini kiritdi.

Birinchi tur yakunlariga ko‘ra eng tezkor 3 futbolchi (FIFA):

• Jordan Bos (Avstraliya) — 36,7 km/soat
• Erling Holand (Norvegiya) — 36,5 km/soat
• Abduqodir Husanov (O‘zbekiston) — 36,5 km/soat

Birinchi turda O‘zbekiston terma jamoasi Kolumbiyaga 1:3 hisobida yutqazdi. Keyingi o‘yin Portugaliyaga qarshi 23-iyun kuni Toshkent vaqti bilan soat 22:00 da bo‘lib o‘tadi.