Masha va ayiqning davomi yangi qahramonlar bilan boʻladi

Animaccord studiyasi yangi "Masha va uch ayiq" animatsion serialini taqdim etdi. Loyiha mashhur Masha va Ayiq franshizasining davomi boʻladi va yangi personajlarni taqdim etadi.

Syujet markazida Masha va uchta yangi qahramon — Katta ayiq, O‘rta ayiq va Kichik ayiq bo‘ladi. Har bir personaj o‘ziga xos xarakter va tarbiya uslubiga ega bo‘lib, hikoya asosan oila va bola tarbiyasi mavzulariga quriladi.

Yangi loyiha klassik ertak — Zlatovlaska va uch ayiq asosida qayta ishlangan. Shu bilan birga, mualliflar zamonaviy tomoshabinlarga yaqin bo‘lgan syujet yaratishga harakat qilgan. Ilhom manbalari orasida Uch erkak va bola filmi ham bor, unda bir nechta kattalar bolaning parvarishi bilan shug‘ullanadi.

Birinchi mavsum oddiy kundalik vaziyatlarga quriladi: uxlatish, soch olish, kundalik odatlar va kichik sarguzashtlar. Mualliflar ushbu voqealar orqali ota-onalarning talab va cheklovlari aslida g‘amxo‘rlikdan kelib chiqishini ko‘rsatishni maqsad qilgan.

Multserial ilk bor Fransiyada o‘tkaziladigan Ansi animatsiya festivalida (21–27 iyun) taqdim etiladi. Birinchi treyler kuzda chiqishi kutilmoqda, to‘liq premyera esa 2027 yilning ikkinchi yarmiga rejalashtirilgan.

Masha va Ayiq multseriali 2009-yildan beri chiqib keladi va dunyodagi eng mashhur bolalar loyihalaridan biriga aylangan. U o‘nlab tillarga tarjima qilingan va YouTube’da yuzlab milliard tomoshaga ega.