Timur Ishmetov: Markaziy bank xizmat koʻrsatish sifati past boʻlgan banklar reytingini taqdim etadi

O‘zbekistonda banklarning mijozlar bilan ishlash sifatini jamoatchilik asosida baholash joriy etilishi rejalashtirilmoqda. Markaziy bank fuqarolarning murojaatlari va ularni ko‘rib chiqish natijalariga qarab eng past ko‘rsatkichga ega bo‘lgan banklar ro‘yxatini muntazam e’lon qiladi.

Yangi tashabbus 13-iyun kuni Oliy Majlis Senatining yalpi majlisida Markaziy bank raisi Timur Ishmetov tomonidan ma’lum qilindi. Uning so‘zlariga ko‘ra, regulyator birinchi marta banklarning mijozlar murojaatlari bilan ishlash samaradorligini baholovchi maxsus indeks ishlab chiqdi.

“Keyingi haftadan eng yomon ko‘rsatkichlarga ega banklarni e’lon qilishni boshlaymiz”, — dedi Ishmetov.

Shuningdek, Markaziy bank ijtimoiy tarmoqlarda bank xizmatlari bilan bog‘liq shikoyatlar uchun alohida kanallar ochishni rejalashtirmoqda. Fuqarolar to‘g‘ridan to‘g‘ri murojaat yuborishi mumkin bo‘ladi, banklar esa bir soat ichida javob berib, muammoni hal qilishi kerak bo‘ladi.

Regulyator avval aloqa bilan bog‘liq muammolar bo‘lganini ham tan oldi. Ularni bartaraf etish uchun koll-markaz yangilanib, zamonaviy aloqa markaziga aylantirildi. Hozir u test rejimida ishlamoqda.

Yangilangan tizim ishga tushirilgach, murojaatlar soni qariyb olti barobar oshdi. Markaziy bank bunga ilgari ko‘plab mijozlar aloqa kanallaridan to‘liq foydalana olmaganini sabab sifatida ko‘rsatmoqda.