Vitamin C yetishmovchiligi miya tuzilishiga ta’sir qilishi aniqlandi

Yaponiya olimlari katta yoshdagi insonlarda vitamin C darajasi va miya holati o‘rtasida bog‘liqlik borligini aniqladi. Tadqiqot natijalari PLOS ONE jurnalida e’lon qilingan bo‘lib, unda 64 yoshdan katta 2 mingdan ortiq ishtirokchi ma’lumotlari tahlil qilingan.

Tadqiqot Xirosaki universiteti Oliy tibbiyot maktabi olimlari tomonidan o‘tkazilgan. Ular ishtirokchilarning qonidagi vitamin C miqdorini miyaning magnit-rezonans tomografiya (MRT) tasvirlari bilan taqqoslab chiqqan. Tahlillar shuni ko‘rsatdiki, qonida vitamin C darajasi past bo‘lgan odamlarning miyasida kulrang modda hajmi kichikroq bo‘lgan. Bundan tashqari, ularda miya hududlari o‘rtasidagi bog‘lanishlar ham sustroq qayd etilgan.

Gap “passiv rejim tarmog‘i” (default mode network) deb ataladigan tizim haqida bormoqda. U insonning diqqat, xotira va ichki fikrlash jarayonlari bilan bog‘liq. Kulrang modda axborotni qayta ishlash, harakatlarni boshqarish va xotirani shakllantirishda muhim rol o‘ynaydi. Uning hajmining kamayishi odatda yosh o‘tishi bilan kognitiv funksiyalarning susayishi bilan bog‘lanadi.

Olimlar natijalarni tahlil qilishda ishtirokchilarning yoshi, jismoniy faolligi va ta’lim darajasini ham hisobga olgan. Shunga qaramay, vitamin C darajasi bilan miya tuzilishi o‘rtasidagi bog‘liqlik saqlanib qolgan.

Tadqiqot mualliflaridan biri Tomohiro Shintaku buni muhim kuzatuv deb baholadi. Uning so‘zlariga ko‘ra, vitamin C ga boy parhez miya salomatligini qo‘llab-quvvatlashda rol o‘ynashi mumkin. Vitamin C kuchli antioksidant hisoblanadi. U hujayralarni oksidlovchi stressdan himoya qiladi va bu jarayon miyaning qarishiga ta’sir ko‘rsatishi mumkin.