Toshkentda 1,4 trillion soʻmga “Daryo boʻyi Business City” barpo etish rejalashtirilmoqda

Toshkent shahrining Bektemir tumanida yirik shaharsozlik loyihasi – “Daryo boʻyi Business City” taqdimoti boʻlib oʻtmoqda. Unda Chirchiq daryosining 16 kilometrlik uchastkasi boʻylab hududni har tomonlama rivojlantirish, yashash, mehnat qilish va dam olish uchun yangi shahar muhitini yaratish koʻzda tutilgan.

Poytaxt hokimligi ma’lumotlariga koʻra, loyihaning umumiy maydoni 958,7 gektarni tashkil qiladi. Shundan 307 gektarga yaqini investitsiya loyihalari uchun ajratilishi rejalashtirilgan. Umumiy qiymati 1 trillion 416 milliard soʻmni tashkil etadi.

Konsepsiya qirgʻoqni obodonlashtirish va turar-joy binolari, tadbirkorlik obyektlari, yashil hududlar va jamoat joylaridan iborat yangi tumanlar barpo etishni nazarda tutadi. Hududni toʻrtta funktsional zonaga boʻlish taklif qilinmoqda: har biri 3 kilometr uzunlikdagi River Siti va Leyk Siti, shuningdek, har biri 5 kilometrdan iborat Villa Siti va Tech Siti.

Amalga oshirishning birinchi bosqichi 144,3 gektar maydonga ega Tech City zonasi boʻladi. Bu yerda 40 gektarga yaqin yer ham sarmoya uchun ajratiladi. Loyihaning ushbu qismida ishlab chiqarish va savdo ob’ektlari, turar-joy binolari va ijtimoiy infratuzilma ob’ektlarini joylashtirish, shuningdek, yashil hududlarni yaratish koʻzda tutilgan.

15 kilometr yoʻl, shuningdek, piyodalar va velosiped yoʻllari qurish rejalashtirilgan. Tech City’ning narxi 390 milliard soʻmga baholanmoqda. Bugungi kunga qadar 187 milliard soʻmdan ortiq mablagʻ oʻzlashtirildi, bu boradagi ishlarni yakunlash uchun yana 168 milliard soʻmga yaqin mablagʻ talab etiladi.

Umumiy maydoni 108 gektar, suv hajmi qariyb 2,3 million kub metr boʻlgan 12 ta sun’iy suv ombori qurish taklif qilinmoqda. Sohillarni mustahkamlash va suv darajasini tartibga solish uchun muhandislik echimlari ham taqdim etiladi.

Taqdimot yakunlari boʻyicha mas’ul boshqarmalarga aholi uchun qulaylik, xavfsizlik, ekologik barqarorlik va iqtisodiy samaradorlikni hisobga olgan holda konsepsiyani yakunlash boʻyicha topshiriqlar berildi.